തിരുവനന്തപുരം: ഇന്ധന സെസ് പിന്‍വലിക്കാത്തതില്‍ പ്രതിഷേധ നടത്തവുമായി പ്രതിപക്ഷ എം.എല്‍.എമാര്‍. പ്രതിപക്ഷ നേതാവിന്റെ നേതൃത്വത്തിലാണ് പ്രതിഷേധ യാത്ര. നികുതിക്കൊള്ള പിടിച്ചുപറി പോക്കറ്റടി എന്നെഴുതിയ ബാനറുമായി ഹോസ്റ്റലില്‍ നിന്ന് കാല്‍നടയായി നിയമസഭയിലേക്കാണ് യാത്ര.

പ്രതിപക്ഷം സമരം ചെയ്യുന്നത് കൊണ്ട് നികുതി കുറക്കില്ല എന്ന് പറയുന്നത് ലോകത്തെവിടെയെങ്കിലും കേട്ടിട്ടുണ്ടോ എന്ന് പ്രതിപക്ഷ നേതാവ് വിഡി സതീശന്‍ മാധ്യമപ്രവര്‍ത്തകരുടെ ചോദ്യങ്ങള്‍ക്ക് പ്രതികരിച്ചു. ഭരണപക്ഷത്തിന് സമരത്തോട് പുച്ഛമാണ്. ജനങ്ങളോടും പുച്ഛമാണ്. തുടര്‍ ഭരണം കിട്ടിയതിന്റെ അഹങ്കാരമാണ് ഇടതു പക്ഷത്തിനെന്നും അദ്ദേഹം കൂട്ടിച്ചേര്‍ത്തു. നികുതി അടക്കാതെ പ്രതിഷേധിക്കണം എന്ന് പറഞ്ഞ നേതാവാണ് ഇപ്പോള്‍ മുഖ്യമന്ത്രി ആയതോടെ പിണറായി എല്ലാം മറന്നെന്നും പ്രതിപക്ഷ നേതാവ് ചൂണ്ടിക്കാട്ടി.