തിരുവനന്തപുരം: സംസ്ഥാനത്ത് കൊവിഡ് രണ്ടാം തരംഗത്തില്‍ രോഗികളുടെ എണ്ണം ലക്ഷം കടന്നതോടെ ആശുപത്രികളില്‍ ഐ.സി.യു ബെഡുകളും കിടക്കകളും നിറയുന്നു. എറണാകുളം, കോഴിക്കോട്, തിരുവനന്തപുരം ജില്ലകളില്‍ അറുപതു ശതമാനത്തിലേറെ കിടക്കകള്‍ നിറഞ്ഞു. കൊവിഡ് ഇതര അസുഖങ്ങള്‍ ബാധിച്ച നിരവധി പേര്‍ ചികിത്സയില്‍ കഴിയുന്നതിനൊപ്പം കൊവിഡ് കേസുകളും ഉയരാന്‍ തുടങ്ങിയതാണ് സര്‍ക്കാര്‍, സ്വകാര്യ ആശുപത്രികളെ പ്രതിസന്ധിയിലാക്കിയത്. ചില ജില്ലകളിലെങ്കിലും സ്വകാര്യ ആശുപത്രികളില്‍ ഓക്‌സിജന്‍ ക്ഷാമവും അനുഭവപ്പെട്ടു തുടങ്ങി. 

രോഗബാധിതരുടെ എണ്ണം കുതിക്കുന്നതിന് ആനുപാതികമായി ഗുരുതരാവസ്ഥയിലുള്ളവരുടെ എണ്ണവും കൂടുകയാണ്. ഐ.സി.യുവില്‍ ചികിത്സയില്‍ കഴിയുന്ന കൊവിഡ് ബാധിതര്‍ 889ഉം വെന്റിലേറ്റര്‍ സഹായത്തിലുള്ളവര്‍ 248ഉം ആണ്. തിരുവനന്തപുരം ജില്ലയില്‍ സര്‍ക്കാര്‍ മേഖലയില്‍ കൊവിഡ് ബാധിതര്‍ക്കായി 789 കിടക്കകള്‍ ആണുള്ളത്. ഇതില്‍ 494ഉം നിറഞ്ഞു. ഐ.സി.യു കിടക്കകള്‍ 136 എണ്ണമുള്ളതില്‍ 31 എണ്ണം മാത്രമാണ് ബാക്കി. 93 വെന്റിലേറ്ററുകളില്‍ 29 എണ്ണമേ അവശേഷിക്കുന്നുളളൂ. രോഗബാധ രൂക്ഷമായ എറണാകുളത്ത് 67 ശതമാനം കിടക്കകളും കോഴിക്കോട് 66 ശതമാനവും നിറഞ്ഞു. 

 സംസ്ഥാനത്തെ സര്‍ക്കാര്‍ ആശുപത്രികളില്‍ ആകെയുള്ള 2,665 ഐ.സി.യു കിടക്കകളില്‍ 1,516 ലും കൊവിഡ് ഇതര രോഗികളുണ്ട്. 2,225 വെന്റിലേറ്ററുകളില്‍ 395 ലും രോഗികളുണ്ട്.  പ്രഥമതല ചികിത്സാ കേന്ദ്രങ്ങളിലും ദ്വിതീയ തല ചികിത്സാ കേന്ദ്രങ്ങളിലും കൊവിഡ് രോഗികളുടെ എണ്ണമുയരുന്നുണ്ട്. 7,085 ഐ.സി.യു കിടക്കകളുള്ള സ്വകാര്യ മേഖലയെക്കൂടി സഹകരിപ്പിച്ച് ക്ഷാമം പരിഹരിക്കാനാണ് നീക്കം. 

സ്വകാര്യ മേഖലയില്‍ ഓക്‌സിജന്‍ ക്ഷാമം വന്നയിടങ്ങളില്‍ സര്‍ക്കാര്‍ മേഖലയില്‍ നിന്നുകൂടി ലഭ്യമാക്കാനും നിര്‍ദേശമുണ്ട്.