കോഴിക്കോട്: വൃക്കരോഗിയെ സഹായിക്കാനെന്ന പേരില്‍ കമ്മിറ്റിയുണ്ടാക്കി പണം നല്‍കാതെ കബളിപ്പിക്കുന്നെന്ന് ആരോപണം. നടുവണ്ണൂര്‍ തോട്ടപ്പുറത്ത് മീത്തല്‍ സലീമിന്റെ ചികിത്സാ സഹായ കമ്മിറ്റിക്കെതിരേയാണു നാട്ടുകാര്‍ വാര്‍ത്താസമ്മേളനം നടത്തി ആക്ഷേപമുയര്‍ത്തിയത്.
നാലു വര്‍ഷമായി വിദേശത്തു നിന്നുള്‍പ്പെടെ ചികിത്സയ്ക്കായി പിരിവെടുക്കുന്നുണ്ടെങ്കിലും ഒരു നയാപെസയും ഇതുവരെ ലഭിച്ചില്ലെന്നു രോഗിയായ സലീമും നാട്ടുകാരും പറയുന്നു. കഴിഞ്ഞ മെയ് മാസത്തിലും നാട്ടുകാര്‍ ഇതു സംബന്ധിച്ചു വാര്‍ത്താസമ്മേളനം നടത്തിയിരുന്നു. തുടര്‍ന്ന്, കമ്മിറ്റിയുടെ ചെയര്‍മാനും കണ്‍വീനറും നാട്ടില്‍ യോഗം വിളിച്ചുചേര്‍ത്ത് ഒന്നേകാല്‍ ലക്ഷം രൂപയോളം അക്കൗണ്ടില്‍ ഉള്ളതായി അറിയിക്കുകയും എല്ലാ കണക്കുകളും ജൂണ്‍ മാസത്തില്‍തന്നെ പുറത്തുവിടുമെന്നു പ്രഖ്യാപിക്കുകയും ചെയ്തിരുന്നു.
എന്നാല്‍, ഇതുവരെയും കമ്മിറ്റി വാഗ്ദാനങ്ങളൊന്നും നിറവേറ്റിയില്ലെന്നും പിരിവെടുത്ത പണത്തെ കുറിച്ചു വ്യക്തതയൊന്നുമില്ലെന്നും സലീം പറഞ്ഞു. ഇതിനിടയില്‍ പ്രധാന ഭാരവാഹികള്‍ വാര്‍ത്താസമ്മേളനം നടത്തി ചികിത്സാ സഹായ സമിതി പിരിച്ചുവിട്ടതായി നാട്ടുകാര്‍ പറയുന്നു. പിരിഞ്ഞുകിട്ടിയ മുഴുവന്‍ തുകയുടെയും കണക്കുകളും രേഖയും ഉടന്‍ പുറത്തുവിടണമെന്നും തുക രോഗിക്കു കൈമാറണമെന്നും സംഘം പറഞ്ഞു.
അലിയാര്‍ കെ. കുളങ്ങരക്കത്ത്, മുഹമ്മദ് അഷറഫ് ടി, ദില്‍ സോസ് എം.വി വാര്‍ത്താസമ്മേളനത്തില്‍ പങ്കെടുത്തു.