പ്രത്യേക ലേഖകൻ
കണ്ണൂർ
സിൽവർ ലൈൻ പദ്ധതി സംബന്ധിച്ച് സി.പി.എമ്മിൽ യാതൊരുവിധ അഭിപ്രായഭിന്നതയുമില്ലെന്ന് നേതാക്കൾ. പദ്ധതിയുടെ കാര്യത്തിൽ പാർട്ടിയിൽ ഏകാഭിപ്രായമാണുള്ളതെന്ന് സി.പി.എം ജനറൽ സെക്രട്ടറി സീതാറാം യെച്ചൂരി പറഞ്ഞു. മറിച്ചൊരു അഭിപ്രായം പാർട്ടിയിലില്ല. ഭിന്നതയുണ്ടെന്ന വാർത്തകൾ അടിസ്ഥാനരഹിതമാണ്. ഇതു സംബന്ധിച്ചു താൻ പറഞ്ഞത് ചിലർ ദുർവ്യാഖ്യാനം ചെയ്തതാണെന്നും അദ്ദേഹം പറഞ്ഞു.
സിൽവർ ലൈൻ പദ്ധതി നടപ്പാക്കണമെന്നത് പാർട്ടിയുടെ ഏകാഭിപ്രായമാണെന്ന് പൊളിറ്റ് ബ്യൂറോ അംഗം എസ്. രാമചന്ദ്രൻ പിള്ള പറഞ്ഞു. പദ്ധതി സംബന്ധിച്ച് നേതാക്കളാരും ഭിന്നാഭിപ്രായം പ്രകടിപ്പിച്ചിട്ടില്ല. ജനവികാരം കൂടി പരിഗണിച്ചായിരിക്കും പദ്ധതി നടപ്പാക്കുകയെന്നും അദ്ദേഹം പറഞ്ഞു.