പത്തനംതിട്ട: തിരുവല്ലയില്‍ ഓശാന ഞായര്‍ ശുശ്രൂഷകള്‍ക്കിടെ ആക്രമണം. തുകലശ്ശേരി സെന്റ് ജോസഫ് പള്ളിയിലെ ഓശാന റാലിക്ക് നേരെയാണ് ആക്രമണമുണ്ടായത്.

റാലിയില്‍ പങ്കെടുത്ത തിരുവല്ല നഗരസഭ വൈസ് ചെയര്‍മാന്‍ ഫിലിപ്പ് ജോര്‍ജ് അടക്കം നാല് പേര്‍ക്ക് നേരെ അക്രമി സംഘം കുരുമുളക് സ്‌പ്രേ അടിച്ചു. റാലിയിലേക്ക് വാഹനം ഇടിച്ചു കയറ്റിയത് ചോദ്യം ചെയ്തതിനെ തുടര്‍ന്നാണ് അക്രമം ഉണ്ടായത്.

തിരുവല്ല നഗരസഭ വൈസ് ചെയര്‍മാന്‍ ഫിലിപ്പ് ജോര്‍ജ്, സ്റ്റീഫന്‍ ജോര്‍ജ്, ജോണ്‍ ജോര്‍ജ്, ഡേവിഡ് ജോസഫ് എന്നിവര്‍ക്ക് നേരെയായിരുന്നു ആക്രമണം.

കാറിലെത്തിയ നാലംഗ സംഘമാണ് കുരുമുളക് സ്‌പ്രേ അടിച്ചത്. അക്രമത്തിന് ശേഷം നാലംഗ സംഘം വാഹനവുമായി രക്ഷപെട്ടു. പരിക്കേറ്റവര്‍ തിരുവല്ലയിലെ സ്വകാര്യ ആശുപത്രിയില്‍ പ്രവേശിപ്പിച്ചു. സംഭവത്തില്‍ തിരുവല്ല പൊലിസ് കേസെടുത്തു.