ലഖ്‌നൗ: 'ഓക്‌സിജന്‍ സിലിണ്ടര്‍ കൊണ്ടുപോകല്ലേ..എന്റെ അമ്മ മരിച്ചു പോകും' അമ്മയ്ക്ക് പ്രാണവായുവിന് വേണ്ടി ഉത്തര്‍പ്രദേശില്‍ പൊലിസിന് മുന്നില്‍ മുട്ടുകുത്തി നമസ്‌കരിച്ച് കേണപേക്ഷിച്ച് മകന്‍. ആഗ്രയിലെ സദറിലുള്ള ഉപാധ്യായ ആശുപത്രിക്ക് മുന്നില്‍ നിന്നുള്ള വേദനിപ്പിക്കുന്ന ദൃശ്യങ്ങള്‍ യൂത്ത് കോണ്‍ഗ്രസാണ് സോഷ്യല്‍ മീഡിയയിലൂടെ പുറത്തുവിട്ടത്. നിങ്ങള്‍ ഇങ്ങനെയാണോ യോഗീ ജനങ്ങളോട് പെരുമാറുന്നതെന്ന് ചോദിച്ചുകൊണ്ടാണ് യൂത്ത് കോണ്‍ഗ്രസിന്റെ ട്വീറ്റ്. 

 

ആശുപത്രിക്കുള്ളില്‍ നിന്ന് പൊലിസിന്റെ സാന്നിധ്യത്തില്‍ ഓക്‌സിജന്‍ സിലിണ്ടര്‍ പുറത്തേക്ക് കൊണ്ടുപോകുന്ന സമയത്താണ് പി.പി.ഇ വസ്ത്രം ധരിച്ചു നില്‍ക്കുന്ന മകന്‍ പൊലിസിനോട് യാചിക്കുന്നത്. തന്റെ അമ്മ ഗുരുതരാവസ്ഥയിലാണെന്നും അയാള്‍ ഉറക്കെ കരഞ്ഞുകൊണ്ട് പറയുന്നുണ്ട്. 'പ്ലീസ് സാര്‍, ദയവായി സിലിണ്ടര്‍ കൊണ്ടുപോകരുത്... ഞാനെവിടെ നിന്ന് സിലിണ്ടറെത്തിക്കും. അമ്മയെ തിരികെ കൊണ്ടുവരുമെന്ന് കുടുംബത്തോട് വാഗ്ദാനം ചെയ്താണ് ഞാന്‍ ഇവിടെയെത്തിയത്'' യുവാവ് കരഞ്ഞ് പറയുന്നു. 

എന്നാല്‍ ഇതൊന്നും ശ്രദ്ധിക്കാതെ പൊലിസുകാര്‍ അവരുടെ ജോലി തുടരുന്നതും വിഡിയോയില്‍ വ്യക്തമാണ്. എന്നാല്‍ നിറച്ച സിലിണ്ടറുകള്‍ എടുത്തുകൊണ്ടുപോയെന്ന ആരോപണങ്ങള്‍ ആഗ്ര പൊലിസ് നിഷേധിച്ചു. 

 

കാലിയായ സിലിണ്ടറുകളാണ് കൊണ്ടുപോയതെന്ന് എസ്.പി പറഞ്ഞു. ആഗ്രയില്‍ രണ്ടു ദിവസം മുന്‍പ് ഓക്‌സിജന്‍ ക്ഷാമമുണ്ടാകുകയും സ്വകാര്യവ്യക്തികള്‍ അവരുടെ സിലിണ്ടറുകള്‍ ആശുപത്രിയില്‍ എത്തിക്കുകയും ചെയ്തിരുന്നു. അത് കാലിയായപ്പോള്‍ തിരിച്ചു കൊണ്ടുപോകുകയായിരുന്നുവെന്നാണ് ആഗ്ര എസ്.പിയുടെ വിശദീകരണം.