കയ്പമംഗലം: വിദ്യാഭ്യാസവും സംസ്‌കാരവും തമ്മില്‍ അഭേദ്യമായ ബന്ധമുണ്ടെന്നും സാംസ്‌കാരികമായി പ്രബുദ്ധമായ ഒരു ജനത വളര്‍ന്നു വരേണ്ടത് കാലഘട്ടത്തിന്റെ ആവശ്യമാണെന്നും ഇ.ടി ടൈസണ്‍ മാസ്റ്റര്‍ എം.എല്‍.എ അഭിപ്രായപ്പെട്ടു.
എ.ഐ.എസ്.എഫ് കൈപ്പമംഗലം പഞ്ചായത്ത് കമ്മിറ്റി ഗ്രാമലക്ഷ്മി ബാബുല്‍ ഉലൂം സ്‌കൂളില്‍ സംഘടിപ്പിച്ച പി.എം നൂറുദ്ദീന്‍ സ്മാരക നാടക ക്യാംപ് ഉദ്ഘാടനം ചെയ്ത് സംസാരിക്കുയായിരുന്നു അദ്ദേഹം. വിദ്യാര്‍ഥി സംഘടനാ പ്രവര്‍ത്തനം സര്‍ഗാത്മകമാക്കിയാല്‍ മാത്രമേ കാംപസുകളിലും സ്‌കൂളുകളിലും വളര്‍ന്നു വരുന്ന ലഹരി ഗുണ്ടാ മാഫിയകളെ അമര്‍ച്ച ചെയ്യാന്‍ സാധിക്കുകയുള്ളൂവെന്നും അദ്ദേഹം പറഞ്ഞു. വി.ആര്‍ ഷൈന്‍ അധ്യക്ഷനായി.  ഇ.ആര്‍ ജോഷി പി.എം.നൂറുദ്ദീന്‍ അനുസ്മരണം നടത്തി. ക്യാംപ് ഡയറക്റ്റര്‍ ജലീല്‍ ടി കുന്നത്ത്, അഡ്വ. പി.ആര്‍.കണ്ണന്‍, നന്ദകുമാര്‍, സോമന്‍ കോതങ്ങത്ത്, സി.നവാസ്, അനഘ പ്രസാദ്, വി.എസ്.ഗോകുല്‍ സംസാരിച്ചു. സി.എ.ധര്‍മ്മദാസ്,നീന നൂറുദ്ദീന്‍, ഷാജി തടത്തില്‍, മറിയം ബീവി എന്നിവര്‍ ക്യാംപിന് നേതൃത്വം നല്‍കി.