കണ്ണൂര്‍: അഞ്ചുവര്‍ഷം മുമ്പ് ഇമേജായിരുന്നു ആദ്യ പ്രശ്‌നം. ചിരിക്കാത്ത നേതാവെന്നു വിമര്‍ശിച്ചവരോട് പിണറായി വിജയന്‍ ചിരിച്ചുതുടങ്ങിയത് 2016ലെ തെരഞ്ഞെടുപ്പിനു തൊട്ടുമുമ്പാണ്. ഇമേജ് മാറ്റം അവിടെ തുടങ്ങുന്നു. കഴിഞ്ഞ അഞ്ചുവര്‍ഷം സര്‍ക്കാരിനെ നയിച്ച് സ്വീകാര്യനായ പിണറായി വീണ്ടും സര്‍ക്കാരിനെ നയിക്കാനെത്തുന്നത് അജയ്യനായാണ്.

2016ല്‍ തെരഞ്ഞെടുപ്പ് പോരിനിറങ്ങുമ്പോള്‍ വി.എസ് അച്യുതാനന്ദനെന്ന പാര്‍ട്ടിയിലെ എതിരാളി പിണറായിക്കു പ്രതിബന്ധമായിരുന്നു. എന്നാല്‍ ഇക്കുറി മന്ത്രിസഭയിലെ മുതിര്‍ന്ന അംഗങ്ങളെ മാറ്റിനിര്‍ത്തി തെരഞ്ഞെടുപ്പ് പോരിനിറങ്ങിയത് സി.പി.എമ്മിലെ ചോദ്യംചെയ്യാനാവാത്ത ഈ നേതാവിന്റെ ആത്മവിശ്വാസംകൊണ്ടു മാത്രമാണ്.

പ്രതിസന്ധികളെ തന്മയത്വത്തോടെ നേരിടാനുള്ള പിണറായി എന്ന നേതാവിന്റെ മികവിനുള്ള അംഗീകാരം കൂടിയാണ് രണ്ടാം ഇടതുതരംഗം. ജന്മനാട് ഉള്‍പ്പെടുന്ന ധര്‍മടത്ത് കഴിഞ്ഞതവണ 36,905 വോട്ടിന്റെ ഭൂരിപക്ഷത്തില്‍ വിജയിച്ച പിണറായി ഇക്കുറി ലീഡ് 50,213 ആയി ഉയര്‍ത്തി. സി.പി.എം പൊളിറ്റ് ബ്യൂറോ അംഗം കൂടിയായ പിണറായിയുടെ നേതൃത്വത്തിലുള്ള ഇടതുമുന്നണി വിജയം രാജ്യത്തെ ഇടതുപക്ഷത്തിനും ആശ്വാസകരമാണ്.

സംസ്ഥാനത്ത് കമ്യൂണിസ്റ്റ് പാര്‍ട്ടി പിറന്ന പാറപ്രം ഉള്‍ക്കൊള്ളുന്ന പിണറായിയില്‍ നിന്ന് ഇടതുപക്ഷ വിദ്യാര്‍ഥി സംഘടനാ പ്രവര്‍ത്തനത്തോടെയാണ് വിജയന്റെ രാഷ്ട്രീയരംഗത്തേക്കുള്ള അരങ്ങേറ്റം. നീണ്ട 17 വര്‍ഷക്കാലം പാര്‍ട്ടിയെ നയിച്ച പാരമ്പര്യവും എഴുപത്തിയേഴുകാരനായ പിണറായിക്കുണ്ട്. ചെത്തുതൊഴിലാളിയായ മുണ്ടയില്‍ കോരന്റെയും കല്യാണിയുടെയും ഇളയ മകനായി 1944 മാര്‍ച്ച് 21നായിരുന്നു ജന നം. പിണറായി ശാരദാവിലാസം എല്‍.പി സ്‌കൂള്‍, പെരളശേരി ഗവ. ഹൈസ്‌കൂള്‍ എന്നിവിടങ്ങളിലെ വിദ്യാഭ്യാസത്തിനു ശേഷം തലശേരി ഗവ. ബ്രണ്ണന്‍ കോളജില്‍ നിന്നു ബി.എ സാമ്പത്തികശാസ്ത്രം പൂര്‍ത്തിയാക്കി.
1986ല്‍ ചടയന്‍ ഗോവിന്ദന്‍ സംസ്ഥാന സെക്രട്ടേറിയറ്റ് അംഗമായപ്പോള്‍ സി.പി.എം കണ്ണൂര്‍ ജില്ലാ സെക്രട്ടറിയായി തെരഞ്ഞെടുക്കപ്പെട്ടു. നായനാര്‍ സര്‍ക്കാരില്‍ സഹകരണ വൈദ്യുതി മന്ത്രിയായിരിക്കെ 1998 സെപ്റ്റംബറില്‍ ചടയന്‍ ഗോവിന്ദന്റെ നിര്യാണത്തെ തുടര്‍ന്നാണ് പാര്‍ട്ടി സംസ്ഥാന സെക്രട്ടറിയായി ആദ്യം തെരഞ്ഞെടുക്കപ്പെട്ടത്. 1970ല്‍ ഇരുപത്തിയാറാം വയസിലാണ് പിണറായി കൂത്തുപറമ്പില്‍നിന്ന് ആദ്യമായി നിയമസഭയിലെത്തിയത്.
പിന്നീട് 1977ലും 1991ലും കൂത്തുപറമ്പില്‍ നിന്ന് തെരഞ്ഞെടുക്കപ്പെട്ട അദ്ദേഹം 1996ല്‍ പയ്യന്നൂരില്‍ നിന്നും നിയമസഭാ സാമാജികനായി. തലശേരി സെന്റ് ജോസഫ്‌സ് ഹൈസ്‌കൂള്‍ റിട്ട. അധ്യാപിക ഒഞ്ചിയം കണ്ണൂക്കര സ്വദേശിനി ടി. കമലയാണ് ഭാര്യ. വിവേക് കിരണ്‍, വീണ എന്നിവരാണ് മക്കള്‍. മരുമകന്‍: മുഹമ്മദ് റിയാസ്. സഹോദരങ്ങള്‍: കുമാരന്‍, നാണു.