തിരുവനന്തപുരം: തലസ്ഥാനജില്ലയില്‍ യു.ഡി.എഫിന്റെ സിറ്റിങ് സീറ്റുകളായ തിരുവനന്തപുരം സെന്‍ട്രലിലും അരുവിക്കരയിലും അപ്രതീക്ഷിത അടിയൊഴുക്കാണുണ്ടായത്. അരുവിക്കരയില്‍ 2016ല്‍ 21,314 വോട്ടിന്റെ ഭൂരിപക്ഷത്തില്‍ വിജയിച്ച കെ.എസ് ശബരീനാഥന് ഇപ്രാവശ്യം 50,46 വോട്ടുകള്‍ക്ക് പരാജയപ്പെടേണ്ടി വന്നു. കഴിഞ്ഞ തെരഞ്ഞെടുപ്പിനേക്കാള്‍ പതിനായിരത്തിലധികം വോട്ടുകള്‍ കുറഞ്ഞു.ജില്ലയില്‍ യു.ഡി.എഫ് ഉറപ്പിച്ചിരുന്ന സീറ്റുകളിലൊന്നായിരുന്നു ഇത്. കഴിഞ്ഞ പ്രാവശ്യം തങ്ങള്‍ക്കും ബി.ജെ.പിക്കും ലഭിച്ച വോട്ടുകള്‍ എല്‍.ഡി.എഫിലേക്ക് പോയെന്നാണ് യു.ഡി.എഫിന്റെ വിലയിരുത്തല്‍. തിരുവനന്തപുരം സെന്‍ട്രലില്‍ യു.ഡി.എഫിനെയും ബി.ജെ.പിയെയും ഞെട്ടിച്ചുകൊണ്ടാണ് എല്‍.ഡി.എഫിന്റെ ആന്റണി രാജു വിജയിച്ചത്.  കഴിഞ്ഞ പ്രാവശ്യം 10,905 വോട്ടുകള്‍ക്കായിരുന്നു വി.എസ് ശിവകുമാര്‍ വിജയിച്ചത്. ഇപ്രാവശ്യം 7,929 വോട്ടിന് എല്‍.ഡി.എഫ് വിജയിച്ചു. ഇവിടെ യു.ഡി.എഫോ ബി.ജെ.പിയോ വിജയിക്കുമെന്നായിരുന്നു  പ്രതീക്ഷിച്ചിരുന്നത്.