അശ്‌റഫ് കൊണ്ടോട്ടി

മലപ്പുറം: കൊവിഡ് ചികിത്സാ കേന്ദ്രങ്ങളില്‍ ഓക്‌സിജന്‍ സിലിണ്ടറുകള്‍ എത്തിക്കേണ്ട ചുമതല ഇനിമുതല്‍ തദ്ദേശ സ്ഥാപനങ്ങള്‍ക്ക്. കൊവിഡ് രണ്ടാം വ്യാപനത്തില്‍ ഓക്‌സിജന്‍ ആവശ്യമായി വരുന്ന രോഗികളുടെ എണ്ണം വര്‍ധിച്ചതോടെയാണിത്. ഇതര സംസ്ഥാനങ്ങളിലുണ്ടായതുപോലെ ഓക്‌സിജന്‍ സിലിണ്ടറിന്റെ കുറവ് മൂലമുള്ള ദുരിതം ഒഴിവാക്കാനാണ് തദ്ദേശ സ്ഥാപനങ്ങള്‍ക്ക് ഉത്തരവാദിത്വം നല്‍കിയത്. തദ്ദേശ സ്ഥാപനങ്ങള്‍ക്ക് കീഴിലെ പ്രാഥമികാരോഗ്യ കേന്ദ്രങ്ങള്‍ മുതല്‍ കൊവിഡ് ഫസ്റ്റ്‌ലൈന്‍ ട്രീറ്റ്‌മെന്റ് സെന്ററുകളില്‍ വരെ കിടക്കകള്‍ ഓക്‌സിജന്‍ സൗകര്യത്തോടെ ക്രമീകരിക്കുന്ന ചുമതലയാണ് തദ്ദേശ സ്ഥാപനങ്ങള്‍ക്ക് നല്‍കിയത്. ഓരോ പ്രാഥമികാരോഗ്യ കേന്ദ്രങ്ങളിലും ആംബുലന്‍സ് ഉള്‍പ്പെടെ രണ്ടില്‍ കുറയാത്ത വാഹനങ്ങള്‍ ഓക്‌സിജന്‍ സൗകര്യത്തോടെ ലഭ്യമാക്കണമെന്നാണ് നിര്‍ദേശം. വീടുകളില്‍ ചികിത്സയില്‍ കഴിയുന്ന രോഗികള്‍ക്ക് അടിയന്തര ഘട്ടങ്ങളില്‍ ഓക്‌സിജന്റെ സഹായവും എത്തിച്ചുനല്‍കും.

 കൊവിഡുമായി ബന്ധപ്പെട്ട് തദ്ദേശ സ്ഥാപനങ്ങളില്‍ 24 മണിക്കൂര്‍ ഹെല്‍പ്പ് ഡെസ്‌ക്ക് ആരംഭിച്ചുവരികയാണ്. സര്‍ക്കാര്‍, സ്വകാര്യ ആശുപത്രികളിലടക്കം ആവശ്യമായ ഓക്‌സിജന്‍ സിലിണ്ടറുകളുടെ കണക്ക് തദ്ദേശ സ്ഥാപനങ്ങള്‍ ശേഖരിക്കുന്നുണ്ട്. രോഗലക്ഷണങ്ങള്‍ ഇല്ലാത്തവരേയും ചെറിയതോതില്‍ ലക്ഷണങ്ങളുള്ളവരുടേയും പ്രത്യേക കണക്കുകളാണ് ആശവര്‍ക്കര്‍മാര്‍ ശേഖരിക്കുന്നത്.