കൊണ്ടോട്ടി
സംസ്ഥാന ഹജ്ജ് കമ്മിറ്റിക്ക് കീഴിൽ തീർഥാടനത്തിന് അപേക്ഷിച്ചവരുടെ നറുക്കെടുപ്പ് ഇന്ന് ഉച്ചക്ക് 12ന് കരിപ്പൂർ ഹജ്ജ് ഹൗസിൽ നടക്കും. ഈ വർഷം ഹജ്ജ് കമ്മിറ്റിക്ക് ലഭിച്ച 10,565 അപേക്ഷകളിൽ നിന്ന് കേരളത്തിനുള്ള ഹജ്ജ് ക്വാട്ടയായ 5,747 സീറ്റുകളിലേക്കാണ് നറുക്കെടുപ്പ് നടത്തുന്നത്.
അപേക്ഷകരിൽ 1,694 പേർ സ്തീകളുടെ വിഭാഗത്തിലും 8,861 പേർ ജനറൽ വിഭാഗത്തിലുമാണ്.
ആദ്യ നറുക്കെടുപ്പിൽ അവസരം ലഭിക്കാത്തവരെ വീണ്ടും നറുക്കെടുത്ത് വെയ്റ്റിങ് ലിസ്റ്റ് തയാറാക്കും. പിന്നീട് മറ്റു സംസ്ഥാനങ്ങളിൽ ഒഴിവ് വരുന്ന സീറ്റുകളിലേക്ക് മുൻഗണനാടിസ്ഥാനത്തിൽ അവസരം നൽകും.
നറുക്കെടുപ്പിന് ശേഷം കവർ ലീഡറുടെ മൊബൈൽ നമ്പറിലേക്ക് ഹജ്ജ് കമ്മിറ്റി സന്ദേശം അയക്കും. അപേക്ഷകരുടെ പാസ്‌പോർട്ട് നമ്പർ നൽകിയാൽ ഹജ്ജ് കമ്മിറ്റിയുടെ വെബ്‌സൈറ്റിൽ നിന്ന് നറുക്കെടുപ്പ് വിവരം അറിയാം.
കൂടുതൽ വിവരങ്ങൾക്ക്- 0483 271 0717, 0483 271 7572. നറുക്കെടുപ്പ് സംസ്ഥാന ഹജ്ജ്കാര്യ മന്ത്രി വി.അബ്ദുറഹിമാൻ ഉദ്ഘാടനം ചെയ്യും. സംസ്ഥാന ഹജ്ജ് കമ്മിറ്റി ചെയർമാൻ സി.മുഹമ്മദ് ഫൈസി അധ്യക്ഷനാകും.