താമരശ്ശേരി: പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിക്കാന്‍ ശ്രമിച്ച കേസില്‍ റന ഗോള്‍ഡ് ജ്വല്ലറി കവര്‍ച്ച കേസിലെ മുഖ്യപ്രതി നവാഫ് അറസ്റ്റില്‍. ഒരു വര്‍ഷം മുന്‍പ് ഇയാള്‍ കുന്ദമംഗലം സ്വദേശിനിയായ പതിനാറുകാരിയെ മൊബൈല്‍ ഫോണിലൂടെ പരിചയപ്പെട്ടിരുന്നു. കഴിഞ്ഞ നവംബറില്‍ ഇയാള്‍ കുട്ടിയുടെ വീട്ടില്‍ ആരുമില്ലാത്ത സമയം നോക്കിയെത്തി പീഡിപ്പിക്കാന്‍ ശ്രമിക്കുകയായിരുന്നു.

ഭയന്നുപോയ കുട്ടി വീട്ടുകാരെ വിവരം അറിയിച്ചിരുന്നില്ല. ഇയാള്‍ തുടര്‍ന്നും കുട്ടിയെ ഫോണിലൂടെയും നേരിട്ടും ശല്യം ചെയ്തു. കവര്‍ച്ച കേസ് അന്വേഷണത്തിനിടെ പ്രതിയുടെ മൊബൈല്‍ ഫോണില്‍നിന്നു കുട്ടിയുടെ ഫോണിലേക്കു നിരന്തരം വിളിച്ചതായി പൊലിസ് കണ്ടെത്തി. തുടര്‍ന്നുള്ള അന്വേഷണത്തിലാണു പീഡിപ്പിക്കാന്‍ ശ്രമിച്ച വിവരം കുട്ടി പറഞ്ഞത്. ജ്വല്ലറി കവര്‍ച്ചയുമായി ബന്ധപ്പെട്ട് ഇയാള്‍ നിലവില്‍ ജയിലിലാണ്. താമരശ്ശേരി പൊലിസ് കേസ് എടുത്തശേഷം കുന്ദമംഗലം പൊലീസിനു കൈമാറുകയായിരുന്നു. പ്രതിയെ 14 ദിവസത്തേക്കു റിമാന്‍ഡ് ചെയ്തു.