ഗസ്സ: പെരുന്നാള്‍ ഉണ്ടായിരുന്നില്ല ഗസ്സയിലെ അല്‍തിബാനി കുടുംബത്തില്‍. ഇനിയൊരു പെരുന്നാള്‍ കൂടാനും ആരുമില്ലവിടെ. ഒരൊറ്റ രാവില്‍ ഇസ്‌റാഈല്‍ തൊടുത്തു വിട്ട ഒരു തീക്കനല്‍ കവര്‍ന്നത് അല്‍തിബാനി കുടുംബത്തിലെ അഞ്ച് ജീവനുകളാണ്. മുഹമ്മദ് അല്‍തിബാനിയും ഭാര്യ റീമയും അഞ്ചു വയസ്സുള്ള സൈദും മൂന്നു വയസ്സുള്ള മറിയമും. ബുധനാഴ്ച നടന്ന വ്യോമാക്രമണത്തിലാണ് ഇവര്‍ കൊല്ലപ്പെടുന്നത്. മരിക്കുമ്പോള്‍ നാലു മാസം ഗര്‍ഭിണിയായിരുന്നു റീമ.

റീമയും സൈദും സംഭവ സ്ഥലത്തു വെച്ചു തന്നെ മരിച്ചിരുന്നു. മുഹമ്മദ് ആശുപത്രിയില്‍ വെച്ചാണ് മരണത്തിന് കീഴടങ്ങിയത്. എന്നാല്‍ മര്‍മയമിന്റെ മൃതദേഹം ഇനിയും കണ്ടെടുത്തിട്ടില്ല. എങ്ങിനെയെയങ്കിലും കുഞ്ഞിന്‍രെ മയ്യിത്ത് കണ്ടെടുത്ത് തരണമെന്നും അവളെ അവളുടെ ഉമ്മാന്റെ അരികില്‍ തന്നെ ഖബറടക്കണമെന്നും താന്‍ ബന്ധപ്പെട്ടവരോട് അഭ്യര്‍ത്ഥിച്ചിട്ടുണ്ടെന്ന് റീമയുടെ കസിന്‍ സൈദ് പറയുന്നു. മുഹ്‌മദിന്റെ മാതാവിനെ മകനും കുടുംബലവും മരിച്ച വിവരം ഇതുവരെ അറിയിച്ചിട്ടില്ല ബന്ധുക്കള്‍.

ഫലസ്തീനു മേല്‍ കനത്ത നാശംവിതച്ച് ബോംബര്‍ വിമാനങ്ങള്‍ തീ തുപ്പുന്നത് തുടരുകയാണ്. കഴിഞ്ഞ ദിവസങ്ങളിലായി സയണിസ്റ്റ് ഭീകരരുടെ താണ്ഡവത്തില്‍ പിഞ്ചുകുഞ്ഞുങ്ങളും സ്ത്രീകളുമടക്കം നൂറിലേറെ ഫലസ്തീനികളാണ് കൊല്ലപ്പെട്ടത്. മരണം 113 ആയതായി ഫലസ്തീന്‍ ആരോഗ്യ മന്ത്രാലയം റിപ്പോര്‍ട്ട് ചെയ്യുന്നു.

അതിനിടെ 2014ലേതിനു സമാനമായി ഗസ്സയില്‍ ഇസ്‌റാഈല്‍ കരയാക്രമണത്തിനും കോപ്പുകൂട്ടുകയാണ്. കരസേന ഗസ്സ കടന്നതായി വ്യാഴാഴ്ച ആദ്യം വെളിപ്പെടുത്തിയ ഇസ്‌റാഈല്‍ പിന്നീട് പിന്‍വലിച്ചെങ്കിലും അതിര്‍ത്തികളില്‍ സേനാവിന്യാസം ശക്തിപ്പെടുത്തിയതായി സ്ഥിരീകരിച്ചിട്ടുണ്ട്. ടാങ്കുകളുടെ സഹായത്തോടെയാണ് സൈനിക നീക്കം ഒരുങ്ങുന്നത്.