അബുദാബി: ഇസ്രഈൽ ആക്രമണത്തിൽ തകർന്ന ഫലസ്തീൻ നഗരത്തിന്‍റെ പുനർനിർമാണത്തിന് യു.എ.ഇ​ 30 ലക്ഷം ഡോളർ സഹായം പ്രഖ്യാപിച്ചു. യു.എ.ഇ ​പ്രസിഡൻറ്​ ശൈഖ്​ മുഹമ്മദ്​ ബിൻ സയ്യിദ്​ ആൽ നഹ്​യാനാണ്​ ഫലസ്തീനുള്ള സഹായധനം പ്രഖ്യാപിച്ചത്​ .കഴിഞ്ഞ മാസമാണ് ഇസ്രഈൽ കുടിയേറ്റക്കാർ ഹുവാരയിൽ അതിക്രമിച്ചുകയറി അഗ്​നിക്കിരയാക്കിയത്.

ഫലസ്​തീൻ ജനതയെ സഹായിക്കുന്നതിനുള്ള യു.എ.ഇയുടെ ജീവകാരുണ്യ പ്രവർത്തനങ്ങളുടെ ഭാഗമായാണ്​ പദ്ധതി പ്രഖ്യാപിച്ചത്​. ഇമാറാത്തി-ഫലസ്തീൻ ഫ്രണ്ട്ഷിപ്പ് ക്ലബ്ബിന്‍റെ സഹകരണത്തോടെ അബുദാബിയിലെ മുനിസിപ്പാലിറ്റി ആൻഡ് ട്രാൻസ്‌പോർട്ട് വകുപ്പാണ് ഈ സംരംഭം നടപ്പിലാക്കുക.

ഹുവാരയിൽ അതിക്രമത്തിനിരയാവർക്കും നാശനഷ്ടങ്ങൾ നേരിട്ടവർക്കുമാണ്​ സഹായം ലഭിക്കുകയെന്നും വാർത്താ എജൻസി റിപ്പോർട്ട്​ ചെയ്തു.