കൊച്ചി: പൊലിസ് കസ്റ്റഡിയില്‍ കുഴഞ്ഞുവീണു മരിച്ച ഇരുമ്പനം സ്വദേശി മനോഹരന്റെ മരണ കാരണം ഹൃദയാഘാതമെന്ന് പോസ്റ്റ്‌മോര്‍ട്ടം റിപ്പോര്‍ട്ട്. തൃശൂര്‍ മെഡിക്കല്‍ കോളജ് ആശുപത്രിയില്‍ നടന്ന പോസ്റ്റ്‌മോര്‍ട്ടത്തിലാണ് മരണകാരണം വ്യക്തമായത്. എന്നാല്‍ ആന്തരിക അവയവങ്ങള്‍ പരിശോധനയ്ക്കായി അയച്ചിട്ടുണ്ട്. ഇതിന്റെ റിപ്പോര്‍ട്ട് പുറത്തുവരേണ്ടതുണ്ട്.
സംഭവത്തില്‍ സംസ്ഥാന മനുഷ്യാവകാശ കമ്മിഷനും കേസെടുത്തു. അന്വേഷിച്ച് ഉടന്‍ റിപ്പോര്‍ട്ട് നല്‍കാന്‍ കൊച്ചി പൊലിസ് കമ്മീഷണര്‍ക്ക് കമ്മിഷന്‍ നിര്‍ദ്ദേശം നല്‍കി.

അതേ സമയം മനോഹരന്റെ ശരീരത്തില്‍ മര്‍ദ്ദനമേറ്റതിന്റെ പാടുകളില്ലെന്നും ഹൃദ്രോഗത്തിന്റെ ലക്ഷണങ്ങള്‍ ഉണ്ടായിരുന്നതായുമാണ് സൂചന.
വാഹന പരിശോധനക്കിടെ മനോഹരനെ പൊലിസ് സംഘം മര്‍ദ്ദിച്ചു എന്ന് ദൃക്‌സാക്ഷികളുടെ മൊഴി പുറത്തുവന്നിരുന്നു.

ഇരുമ്പനത്ത് പൊലിസ് പരിശോധന സംഘത്തിന്റെ ഭാഗത്ത് നിന്നുണ്ടായ കുറ്റകൃത്യത്തില്‍ എസ്.ഐ ജിമ്മി ജോസിനെതിരെ മാത്രമാണ് നടപടി. ക്രൈംബ്രാഞ്ച് കേസ് അന്വേഷിക്കും. ഇന്നലെ രാത്രി ഒന്‍പതു മണിക്കാണ് ഇരുമ്പനം കര്‍ഷക കോളനിയിലെ വളവില്‍, ഹില്‍ പാലസ് പൊലിസ് സംഘം പരിശോധന നടത്തിയത്.
സ്‌പെയര്‍ പാര്‍ട്‌സ് കട അടച്ച് വീട്ടില്‍ വരികയായിരുന്ന മനോഹരനെ ഇരുട്ടില്‍ ഒരു പൊലിസുകാരന്‍ കൈകാണിച്ചു.

വാഹനം നിര്‍ത്താതെ മുന്നോട്ട് പോയ ഇയാളെ വളവില്‍ പൊലിസ് തടഞ്ഞു. വണ്ടി നിര്‍ത്തിയ മനോഹരനെ വണ്ടി നിര്‍ത്താത്തത് ചോദ്യം ചെയ്ത് പൊലിസ് മുഖത്തടിച്ചു എന്നാണ് ദൃക്‌സാക്ഷിയുടെ മൊഴി.