ന്യൂഡല്‍ഹി: രാജ്യത്ത് ഇന്നലെ വരെ റിപ്പോര്‍ട്ട്‌ചെയ്തത് 8,848 മ്യൂക്കോര്‍മൈക്കോസിസ് (ബ്ലാക്ക് ഫംഗസ്) കേസുകള്‍. ആകെ രോഗികളുടെ 60 ശതമാനവും ഗുജറാത്ത്, മഹാരാഷ്ട്ര, ആന്ധ്രപ്രദേശ് എന്നീ സംസ്ഥാനങ്ങളിലാണ്. ഗുജറാത്തിലാണ് കൂടുതല്‍ കേസുകള്‍- 2,281. മഹാരാഷ്ട്രയില്‍ 2000ഉം ആന്ധ്രയില്‍ 910ഉം മധ്യപ്രധേശില്‍ 720ഉം രാജസ്ഥാനില്‍ 700ഉം കര്‍ണാടകയില്‍ 500 കേസുകളുമാണ് റിപ്പോര്‍ട്ട്‌ചെയ്തത്. കേന്ദ്രത്തിന്റെ കണക്ക് പ്രകാരം കേരളത്തില്‍ ഇതുവരെ 40ല്‍ താഴെ കേസുകളാണുള്ളത്.

 

അതേസമയം, രോഗബാധിതരുടെ എണ്ണം വര്‍ധിക്കുന്ന സാഹചര്യത്തില്‍ ഫംഗസ് ബാധ ചികിത്സയ്ക്കായി ഉപയോഗിക്കുന്ന മരുന്നിന്റെ അധിക ഡോസുകള്‍ വിവിധ സംസ്ഥാനങ്ങളിലേക്ക് അയച്ചതായി കേന്ദ്രസര്‍ക്കാര്‍ അറിയിച്ചു. വിവിധ സംസ്ഥാനങ്ങളില്‍ വര്‍ധിച്ചുവരുന്ന ബ്ലാക്ക് ഫംഗസ് കേസുകളുടെ വിശദമായ അവലോകനത്തിന് ശേഷം, ആംഫോട്ടെറിസിന്‍-ബിയുടെ 23,680 അധിക ഡോസുകള്‍ എല്ലാ സംസ്ഥാനങ്ങള്‍ക്കും കേന്ദ്രഭരണ പ്രദേശങ്ങള്‍ക്കും അനുവദിച്ചിട്ടുണ്ടെന്ന് കേന്ദ്രമന്ത്രി സദാനന്ദ ഗൗഡ ട്വീറ്റ് ചെയ്തു. ഗുജറാത്തിന് 5,800 ഡോസുകള്‍ അനുവദിച്ചു. മഹാരാഷ്ട്രയ്ക്ക് 5,090 ഡോസുകളും നല്‍കി.