തിരുവനന്തപുരം: പിന്നണി ഗായിക സംഗീത സചിത് (46) അന്തരിച്ചു. വൃക്കരോഗത്തെ തുടര്‍ന്ന് ചികിത്സയിലായിരുന്നു. തിരുവനന്തപുരത്ത് സഹോദരിയുടെ വീട്ടില്‍ ഇന്ന് പുലര്‍ച്ചെയായിരുന്നു അന്ത്യം. സംസ്‌കാരം വൈകിട്ട് മൂന്നു മണിക്ക് തൈക്കാട് ശാന്തി കവാടത്തില്‍ നടക്കും.

മലയാളം, തെലുങ്ക്, തമിഴ്, കന്നഡ ഭാഷകളിലായി ഇരുന്നൂറോളം സിനിമകളില്‍ ഗാനങ്ങള്‍ ആലപിച്ചിട്ടുണ്ട്. നിരവധി ആല്‍ബങ്ങളിലും പാടിയിട്ടുണ്ട്. സംഗീത പാടിയ 'എന്ന് സ്വന്തം ജാനകിക്കുട്ടി' എന്ന ചിത്രത്തിലെ 'അമ്പിളിപ്പൂവട്ടം പൊന്നുരുളി' എന്ന ഗാനം ഏറെ ഹിറ്റായിരുന്നു.

എ ആര്‍ റഹ്മാന്റെ സംഗീത സംവിധാനത്തിലുള്ള മിസ്റ്റര്‍ റോമിയോയില്‍ പാടിയ 'തണ്ണീരൈ കാതലിക്കും' എന്ന ഗാനവും ഏറെ ശ്രദ്ധ നേടിയിരുന്നു.