തിരുവനന്തപുരം: സംസ്ഥാനത്തെ ബസുകളില്‍ ക്യാമറ ഘടിപ്പിക്കാന്‍ സാവകാശം നീട്ടി നല്‍കി ഗതാഗത വകുപ്പ്. ബസുകളില്‍ ക്യാമറ ഘടിപ്പിക്കാനുള്ള സമയപരിധി ജൂണ്‍ 30 വരെയാണ് ദീര്‍ഘിപ്പിച്ചത്. ഇത് സംബന്ധിച്ച വിവരങ്ങള്‍ ഗതാഗത മന്ത്രി ആന്റണി രാജു അറിയിച്ചിട്ടുണ്ട്. നേരത്തെ മാര്‍ച്ച് 31 വരെയായിരുന്നു ക്യാമറകള്‍ ഘടിപ്പിക്കാന്‍ സമയം നല്‍കിയിരുന്നത്. ബസുകളുടെ മത്സരയോട്ടം മൂലമുള്ള വാഹനാപകടങ്ങള്‍ നിയന്ത്രിക്കാന്‍ ബസുകളുടെ അകത്തും പുറത്തും ക്യാമറ സ്ഥാപിക്കാന്‍ സര്‍ക്കാര്‍ നിര്‍ദ്ദേശം നല്‍കിയിട്ടുണ്ട്.

ബസുകളില്‍ ഘടിപ്പിക്കാന്‍ നിലവാരമുള്ള ക്യാമറകളുടെ ദൗര്‍ലഭ്യം നേരിട്ടിരുന്നു. കൂടുതല്‍ ക്യാമറകള്‍ ആവശ്യമായി വന്നപ്പോള്‍ കമ്പനികള്‍ അമിത വിലയാണ് ഈടാക്കിയത്. ഈ ചൂഷണം ശ്രദ്ധയില്‍പ്പെട്ടതിനെ തുടര്‍ന്നാണ് സമയപരിധി വീണ്ടും ദീര്‍ഘിപ്പിച്ചത്. ബസിന്റെ മുന്‍ഭാഗത്തെ റോഡും ബസിന്റെ അകവശവും കാണാനാവുന്ന തരത്തിലായിരിക്കണം ക്യാമറ ഘടിപ്പിക്കേണ്ടത്. ഇതിനാവശ്യമായ ചെലവിന്റെ 50 ശതമാനം റോഡ് സുരക്ഷാ അതോറിറ്റി വഹിക്കും.

ഓരോ ബസുകളും നിയമവിധേയമായാണോ പ്രവര്‍ത്തിക്കുന്നതെന്ന കാര്യം നിരന്തരം പരിശോധിക്കാനും ഉദ്യോഗസ്ഥര്‍ക്ക് ചുമതല നല്‍കിയിരുന്നു. ഇതിനുപുറമേ, കെഎസ്ആര്‍ടിസിയുടെ ടെന്‍ഡര്‍ നടപടികള്‍ പൂര്‍ത്തിയാക്കാന്‍ കൂടുതല്‍ സമയം ആവശ്യമായതും സമയപരിധി കൂട്ടാന്‍ കാരണമായി. വിദ്യാഭ്യാസ സ്ഥാപനങ്ങളുടെ ബസുകള്‍ക്കും, കോണ്‍ടാക്ട് കാരിയേജുകള്‍ക്കും ക്യാമറ നിര്‍ബന്ധമാക്കാന്‍ തീരുമാനിച്ചിട്ടുണ്ട്.