കിളിമാനൂര്‍: മടവൂരിലെ ഒരു കോഴിഫാമില്‍  തെരുവുനായ്ക്കളുടെ പരാക്രമണം. അഞ്ഞൂറോളം കോഴികളെ കടിച്ചുകൊന്നിട്ടുണ്ട്. ഇതോടെ പുറത്തിറങ്ങാന്‍ പോലും കഴിയാതെ ഭീതിയിലായിരിക്കുകയാണ് നാട്ടുകാര്‍.
മടവൂര്‍ പാറയില്‍ ജാഫര്‍ മന്‍സിലില്‍ വഹാബിന്റെ കോഴികളെയാണ് തെരുവുനായ്ക്കള്‍ കൊന്നത്. ഇന്നലെ പുലര്‍ച്ചെ അഞ്ചോടെ കോഴികളുടെ ബഹളം കേട്ടുണര്‍ന്ന വഹാബ് ഫാമില്‍ എത്തുമ്പോള്‍ ഏഴോളം നായ്ക്കള്‍ കൂട്ടിനകത്തുണ്ടായിരുന്നു. ഇവയെ കല്ലെറിഞ്ഞു ഓടിക്കുകയായിരുന്നു. കൂടിന്റെ കമ്പിവേലി തകര്‍ത്താണ് നായ്ക്കൂട്ടം അകത്തുകടന്നത്.
പൂര്‍ണ വളര്‍ച്ചയെത്തിയ 300 കോഴികളും പകുതി വളര്‍ച്ചയെത്തിയ 200 കോഴികളും ചത്തതായും വഹാബ് പറഞ്ഞു. ഒന്നര ലക്ഷം രൂപയുടെ നഷ്ടം സംഭവിച്ചതായാണ്
കണക്ക്. വിവരം അറിഞ്ഞ് പഞ്ചായത്ത് കൃഷി വകുപ്പ് അധികൃതരും മൃഗഡോക്ടറും സ്ഥലം സന്ദര്‍ശിച്ചു.