കൊച്ചി
ജീവനക്കാര്‍ക്ക് ശമ്പളം ലഭിക്കുന്നതുവരെ കെ.എസ്.ആര്‍.ടി.സി ഓഫിസര്‍മാരുടെയും സൂപ്പര്‍വൈസര്‍മാരുടെയും ശമ്പളം തടയണമെന്ന ജീവനക്കാരുടെ ആവശ്യം ന്യായമാണെന്ന് ഹൈക്കോടതി.
കാലതാമസമില്ലാതെ ശമ്പളം നല്‍കണമെന്ന കെ.എസ്.ആര്‍.ടി.സി ജീവനക്കാരുടെ ഹരജി പരിഗണിക്കവെയാണ് കോടതി ഇക്കാര്യം വ്യക്തമാക്കിയത്.കെ.എസ്.ആര്‍.ടി.സിയുടെ വിശദീകരണം കേട്ടശേഷം ആവശ്യമെങ്കില്‍ ഇത്തരം ഒരുത്തരവ് നല്‍കാന്‍ മടിക്കില്ലെന്നും ജസ്റ്റിസ് ദേവന്‍ രാമചന്ദ്രന്‍ വ്യക്തമാക്കി.ശമ്പളം വൈകുന്നതു ചൂണ്ടിക്കാട്ടി കെ.എസ്.ആര്‍.ടി.സി ജീവനക്കാരന്‍ ആര്‍.ബാജിയടക്കം മൂന്നു പേര്‍ നല്‍കിയ ഹരജി പരിഗണിച്ചാണ് സിംഗിള്‍ബെഞ്ച് ഇക്കാര്യം പറഞ്ഞത്.
കെ.എസ്.ആര്‍.ടി.സിയുടെ വരുമാനത്തില്‍ വായ്പാതുക തിരിച്ചടവിനാണ് മുന്‍ഗണനയെന്നും ഓഫിസര്‍മാര്‍ക്കും സൂപ്പര്‍വൈസര്‍മാര്‍ക്കും കൃത്യമായി ശമ്പളം ലഭിക്കുന്നുണ്ടെന്നും ഹരജിക്കാര്‍ ആരോപിച്ചു.എന്നാല്‍ കമ്പനി നേരിടുന്ന ബാധ്യതകളും പ്രതിസന്ധികളുമൊക്കെ കെ.എസ്.ആര്‍.ടി.സിയുടെ അഭിഭാഷകന്‍ വിശദീകരിച്ചു.
എന്നാല്‍ എന്തുതന്നെ ന്യായം പറഞ്ഞാലും ജീവനക്കാരുടെ ദുര്‍ഗതി കണ്ടില്ലെന്ന് നടിക്കാനാവില്ലെന്നും കൃത്യസമയത്തു ശമ്പളം നല്‍കണമെന്നും ഹൈക്കോടതി നിര്‍ദേശിച്ചു.
ശമ്പളം കുടിശ്ശികയാണെന്ന ഗൗരവമുള്ള പരാതി ഫലപ്രദമായും സന്ദര്‍ഭോചിതമായും പരിഹാരം കണ്ടെത്താന്‍ ഓഫിസര്‍മാര്‍ക്ക് കഴിയണം.കെ.എസ്.ആര്‍.ടി.സി പറയുന്നത് വിശ്വസിച്ചിരിക്കാന്‍ കോടതിക്ക് കഴിയില്ല.
കെ.എസ്.ആര്‍.ടി.സിക്ക് ലാഭം മുഖ്യലക്ഷ്യമല്ലെന്നും പൊതുതാത്പര്യത്തിലാണ് സര്‍വിസ് നടത്തുന്നതെന്നും കെ.എസ്.ആര്‍.ടി.സിയുടെ അഭിഭാഷകന്‍ വ്യക്തമാക്കി.
എന്നാല്‍ കെ.എസ്.ആര്‍.ടി.സിക്ക് ലാഭമില്ലെങ്കില്‍ നഷ്ടം നികത്താന്‍ സര്‍ക്കാര്‍ ഇടപെടേണ്ടി വരുമെന്നതിനാല്‍ സര്‍ക്കാര്‍ ഇതിനു മറുപടി നല്‍കണമെന്ന് ഹൈക്കോടതി പറഞ്ഞു.തുടര്‍ന്ന് കെ.എസ്.ആര്‍.ടി.സിയുടെയും സര്‍ക്കാരിന്റെയും വിശദീകരണത്തിനായി ഹരജി ജൂണ്‍ എട്ടിലേക്ക് മാറ്റി.