ന്യൂഡല്‍ഹി: കോണ്‍ഗ്രസിന്റെ അമിത ആത്മവിശ്വാസം കേരളത്തില്‍ കനത്ത പരാജയത്തിന് കാരണമായതായി അഞ്ചു സംസ്ഥാനങ്ങളിലെ തെരഞ്ഞെടുപ്പില്‍ പാര്‍ട്ടിക്കുണ്ടായ തോല്‍വി സംബന്ധിച്ച് പഠിക്കാന്‍ നിയോഗിച്ച ആശോക് ചവാന്‍ സമിതി റിപ്പോര്‍ട്ട്. റിപ്പോര്‍ട്ട് കോണ്‍ഗ്രസ് ഇടക്കാല അധ്യക്ഷ സോണിയാ ഗാന്ധിക്ക് സമര്‍പ്പിച്ചു. കേരളം, അസം, പുതുച്ചേരി സംസ്ഥാനങ്ങളിലെ പരാജയം സംബന്ധിച്ച റിപ്പോര്‍ട്ടുകളാണ് കൈമാറിയത്.

കേരളത്തില്‍ കൂട്ടായ നേതൃത്വമുണ്ടായില്ലെന്ന് ചൂണ്ടിക്കാട്ടിയ റിപ്പോര്‍ട്ട് പക്ഷേ തോല്‍വിക്ക് കാരണക്കാരായി ആരെയും പേരെടുത്ത് കുറ്റപ്പെടുത്തിയില്ല. പാര്‍ട്ടി നേതൃതലത്തില്‍ അഴിച്ചുപണി വേണമെന്ന് റിപ്പോര്‍ട്ട് ശുപാര്‍ശ ചെയ്തിട്ടുണ്ട്. മെയ് 11നാണ് അശോക് ചവാന്റെ നേതൃത്വത്തില്‍ കോണ്‍ഗ്രസ് അഞ്ചംഗ സമിതിക്ക് രൂപം നല്‍കിയത്.

സല്‍മാന്‍ ഖുര്‍ഷിദ്, മനീഷ് തിവാരി, വിന്‍സെന്റ് എച്ച്. പാല, ജോതി മണി എന്നിവരാണ് സമിതിയംഗങ്ങള്‍. ചൊവ്വാഴ്ച രാത്രി കൈമാറിയ റിപ്പോര്‍ട്ട് പ്രവര്‍ത്തക സമിതി പരിശോധിക്കും.

ഇതിന്റെ അടിസ്ഥാനത്തിലായിരിക്കും കെ.പി.സി.സി പ്രസിഡന്റിന്റെ കാര്യത്തില്‍ ഹൈക്കമാന്‍ഡ് തീരുമാനമെടുക്കുക. കൊവിഡ് ലോക്ക്ഡൗണായതിനാല്‍ സമിതിക്ക് കേരളത്തില്‍ നേരിട്ട് എത്താന്‍ സാധിച്ചിരുന്നില്ല.
നേതാക്കളുമായി ഓണ്‍ലൈനില്‍ സംസാരിച്ചാണ് വിവരങ്ങള്‍ ആരാഞ്ഞത്. എം.എല്‍.എമാര്‍, എം.പിമാര്‍, മറ്റു ജനപ്രതിനിധികള്‍, മുതിര്‍ന്ന നേതാക്കള്‍, മാധ്യമപ്രവര്‍ത്തകര്‍, രാഷ്ട്രീയ നിരീക്ഷകര്‍ എന്നിവരില്‍ നിന്നെല്ലാം നിരീക്ഷണങ്ങള്‍ സ്വരൂപിച്ചു. ബംഗാള്‍ തോല്‍വി സംബന്ധിച്ച റിപ്പോര്‍ട്ട് വൈകാതെ കൈമാറും.