പി.കെ മുഹമ്മദ് ഹാത്തിഫ്
തിരുവനന്തപുരം
സെക്രട്ടേറിയറ്റ് മുതൽ വില്ലേജ് തലം വരെ കുടുങ്ങിക്കിടക്കുന്ന ലക്ഷത്തിലധികം വരുന്ന ഫയലുകൾ തീർപ്പാക്കാൻ നേരിട്ടിറങ്ങി മുഖ്യമന്ത്രി. കുടുങ്ങിക്കിടക്കുന്ന ഫയലുകളെ കുറിച്ച് സുപ്രഭാതം വാർത്ത നൽകിയിരുന്നു.

ഫയലുകൾ വേഗത്തിൽ തീർപ്പാക്കാൻ വകുപ്പുകൾക്ക് നിർദേശം നൽകുന്ന ഉത്തരവ് ഈ മാസം നാലിന് ഉദ്യോഗസ്ഥ- ഭരണ പരിഷ്‌കരണ വകുപ്പ് പുറത്തിറക്കി. 15 മുതൽ സെപ്റ്റംബർ 30 വരെ നീണ്ടു നിൽക്കുന്ന തീവ്രയജ്ഞ പരിപാടിയാണ് നടപ്പാക്കുക. എല്ലാവകുപ്പുകൾക്കും 17 ഇന മാർഗ നിർദേശങ്ങളും എട്ടിന ആക്ഷൻ പ്ലാനും തയാറാക്കി നൽകി.
ഫയൽ തീർപ്പാക്കുന്നതു സംബന്ധിച്ച് ഉദ്യോഗസ്ഥതലത്തിൽ വ്യാപകമായ വീഴ്ചയാണ് സംഭവിക്കുന്നതെന്ന കടുത്ത വിമർശനവും ഉത്തരവിലുണ്ട്. ഉദ്യോഗസ്ഥർ ഔദ്യോഗിക ചുമതലകൾ പൂർണമായും വിനിയോഗിക്കുന്നുണ്ടെന്ന് ഉറപ്പു വരുത്താൻ വകുപ്പു മന്ത്രിമാർക്ക് നിർദേശം നൽകിയിട്ടുണ്ട്. എല്ലാ സർക്കാർ ഓഫിസുകളിലേയും ഫയലുകൾ തീർപ്പാക്കാൻ അതത് വകുപ്പ് മന്ത്രിമാർ നേതൃത്വം നൽകണം.
ഉദ്യോഗസ്ഥതലത്തിലെ പൊതു മേൽനോട്ടത്തിനും സെക്രട്ടേറിയറ്റിൽ നിലവിലുള്ള ഇഓഫിസ് സംവിധാനത്തിലെ അപാകതകൾ പരിഹരിക്കാനും ചീഫ് സെക്രട്ടറിക്ക് ചുമതല നൽകി. ജീവനക്കാരുടേയും സർവിസ് സംഘടനകളുടേയും പൂർണസഹകരണം ഉറപ്പു വരുത്താനുള്ള ചുമതലയും ചീഫ് സെക്രട്ടറിക്കാണ്. ഫയൽ തീർപ്പാക്കുമ്പോഴുണ്ടാവുന്ന തടസങ്ങൾ ലഘൂകരിക്കുന്നതിന് അതതു വകുപ്പ് സെക്രട്ടറിമാർ ചീഫ് സെക്രട്ടറിക്ക് കൈമാറി മന്ത്രിസഭയ്ക്ക് സമർപ്പിക്കാനും നിർദേശമുണ്ട്. ഓരോ മാസവും ഫയൽ തീർപ്പാക്കുന്നതിന്റെ പുരോഗതി മന്ത്രിസഭയിൽ ചർച്ച ചെയ്യുമെന്നും ഉത്തരവിൽ പറയുന്നു.
സെപ്റ്റംബർ 30 നകം ഫയലുകൾ മുഴുവൻ തീർപ്പാക്കി ഒക്ടോബർ പത്തിനകം എല്ലാ വകുപ്പുകളും ഇതിന്റെ പുരോഗതി സംബന്ധിച്ച റിപ്പോർട്ട് സമർപ്പിക്കാൻ നിർദേശിക്കുന്നുണ്ട്. എല്ലാ വകുപ്പുകളുടേയും ഏകോപന ചുമതല ഉദ്യോഗസ്ഥ- ഭരണപരിഷ്‌കാര വകുപ്പിനായിരിക്കുമെന്നും ഉത്തരവിൽ പറയുന്നു.

ജൂൺ 15 ന് എല്ലാ സർക്കാർ ഉദ്യോഗസ്ഥരേയും ഓൺലൈനായി അഭിസംബോധന ചെയ്തു കൊണ്ട് മുഖ്യമന്ത്രി ഫയൽ തീർപ്പാക്കൽ പദ്ധതി ഉദ്ഘാടനം ചെയ്യും.
പൊതുഭരണം, റവന്യൂ, തദ്ദേശ സ്വയംഭരണം, വിദ്യാഭ്യാസം, ആഭ്യന്തരം, ധനകാര്യം, ആരോഗ്യം തുടങ്ങിയ വകുപ്പുകളിലാണ് ഏറ്റവും കൂടുതൽ ഫയലുകൾ കെട്ടിക്കിടക്കുന്നത്. മുഖ്യമന്ത്രിയുടെ വകുപ്പായ പൊതുഭരണ വകുപ്പിൽ 11,415 ഫയലുകളാണ് കുരുങ്ങിക്കിടക്കുന്നത്.