പാലക്കാട്
വീട്ടമ്മ കുളിക്കുന്നതിന്റെ ദൃശ്യങ്ങള്‍ പകര്‍ത്താന്‍ ശ്രമിച്ചെന്ന പരാതിയില്‍ സി.പി.എം ബ്രാഞ്ച് സെക്രട്ടറിക്കെതിരേ കേസെടുത്തു. പാലക്കാട് കൊടുമ്പ് അമ്പലപ്പറമ്പ് ബ്രാഞ്ച് സെക്രട്ടറി ഷാജഹാനെതിരെയാണ് സൗത്ത് പൊലിസ് കേസെടുത്തത്.

വ്യാഴാഴ്ച രാത്രി 10നാണ് സംഭവം. ഷാജഹാന്റെ വീടിനു സമീപത്താണ് വീട്ടമ്മയും കുടുംബവും വാടകയ്ക്ക് താമസിക്കുന്നത്. ഇയാൾ വീട്ടമ്മയുടെ കുളിമുറിയില്‍ മൊബൈല്‍ ഫോണ്‍ കാമറ വച്ച് ദൃശ്യം പകര്‍ത്താന്‍ ശ്രമിക്കുകയായിരുന്നു. കുളിമുറിയുടെ ജനലിന് സമീപം നിഴല്‍ കണ്ട് വീട്ടമ്മ ബഹളം വച്ചതോടെ ഷാജഹാന്‍ മൊബൈല്‍ ഫോണ്‍ ഉപേക്ഷിച്ച് രക്ഷപ്പെട്ടു. സഹായം തേടി വീട്ടമ്മ ഇയാളുടെ ഫോണിലേക്ക് വിളിച്ചപ്പോഴാണ് ഉപേക്ഷിക്കപ്പെട്ട മൊബൈല്‍ പ്രതി ഷാജഹാൻ്റെതാണെന്ന് തിരിച്ചറിഞ്ഞത്. ഷാജഹാന്റെ ഫോണിലെ റിങ്‌ടോണായ 'ചോര വീണ മണ്ണില്‍ നിന്ന്..' എന്ന പാട്ടാണ് പ്രതിയെ തിരിച്ചറിയാന്‍ സഹായിച്ചത്.പിന്നാലെ വീട്ടമ്മ പൊലിസില്‍ മൊബൈല്‍ ഫോണ്‍ സഹിതം പരാതി നല്‍കി. മൊബൈല്‍ ഫോണ്‍ ശാസ്ത്രീയ പരിശോധനയ്ക്ക് അയയ്ക്കുമെന്ന് പൊലിസ് അറിയിച്ചു. ഷാജഹാന്‍ ഒളിവിലാണെന്നും പൊലിസ് പറഞ്ഞു. വീട്ടമ്മ പാര്‍ട്ടിപ്രവര്‍ത്തകരെ വിവരം അറിയിച്ചതിനെ തുടര്‍ന്ന് ഷാജഹാനെ പാര്‍ട്ടിയുടെ പ്രാഥമിക അംഗത്വത്തില്‍നിന്ന് സസ്‌പെന്‍ഡ് ചെയ്തു.