മിനിക്കോയ്: മിനിക്കോയ് ദ്വീപില്‍ നിന്ന് ജില്ലാ പഞ്ചായത്തിലേക്ക് നടന്ന ഒഴിവ് വന്ന സീറ്റിലേക്ക് നടന്ന ഉപ തെരെഞ്ഞെടുപ്പില്‍ കോണ്‍ഗ്രസ്സിന് വിജയം. കോണ്‍ഗ്രസ് സ്ഥാനാര്‍ഥി ശംസുദ്ദീന്‍ അരപ്പാളി എതിര്‍ സ്ഥാനാര്‍ഥി എന്‍.സി.പിയിലെ ഐമൂസ ഇടയാക്കലിനെയാണ് പരാജയപ്പെടുത്തിയത്. ആകെ പോള്‍ ചൈയ്ത 982 വോട്ടുകളില്‍ 783 വോട്ടുകള്‍ കോണ്‍ഗ്രസിന് ലഭിച്ചപ്പോള്‍ 192 വോട്ടുകളാണ് എന്‍.സി.പിക്ക് ലഭിച്ചത്. 591 വോട്ടുകളുടെ വലിയ ഭൂരിപക്ഷം നേടിയ കോണ്‍ഗ്രസ്സ് ക്യാംപ് ആഹ്ലാദത്തിലാണു.
ജനാധിപത്യത്തിന്റെ അന്തസ്സുയര്‍ത്തി  വന്‍ വിജയം നേടിയ കോണ്‍ഗ്രസ്സ് സ്ഥാനാര്‍ഥി ശംസുദ്ദീനേയും മിനിക്കോയ് ദ്വീപിലെ കോണ്‍ഗ്രസ്സ് പ്രവര്‍ത്തകരെയും വോട്ടര്‍മാരെയും ലക്ഷദ്വീപ് പ്രദേശ് കോണ്‍ഗ്രസ്സ് അധ്യക്ഷന്‍ ഹംദുള്ളാ സഈദ് അഭിനന്ദിച്ചു. കാലുമാറ്റവും പണാധിപത്യവും ദ്വീപ് ജനത ഒരു കാലത്തുമംഗീകരിക്കില്ലെന്നതിന്റെ മികച്ച ഉദാഹരണമാണു മിനിക്കോയിയിലെ കോണ്‍ഗ്രസ്സ് വിജയമെന്നും കോണ്‍ഗ്രസ്സ് ആദര്‍ശത്തെ കുഴിച്ച് മൂടാന്‍ നടക്കുന്നവര്‍ക്കുള്ള കനത്ത താക്കീത് കൂടിയാണീ ജനവിധിയെന്നും യൂത്ത് കോണ്‍ഗ്രസ്സ് സ്റ്റേറ്റ് പ്രസിഡന്റ് എം അലിഅക്ബര്‍ പറഞ്ഞു.