കാക്കനാട്: നഗരസഭയുടെ നേതൃത്വത്തില്‍ സെപ്റ്റംബര്‍ മൂന്ന് മുതല്‍ 19 വരെ ഓണാഘോഷം സംഘടിപ്പിക്കുമെന്ന് നഗരസഭാ ചെയര്‍പേഴ്‌സണ്‍ കെ.കെ നീനു, വൈസ്. ചെയര്‍മാന്‍ സാബു ഫ്രാന്‍സിസ് എന്നിവര്‍ അറിയിച്ചു.
മൂന്നിന് വൈകിട്ട് അഞ്ചിന് ഓണവിളംബര ജാഥ നടത്തും. എന്‍.ജി.ഒ ക്വാര്‍ട്ടേഴ്‌സ്, പ്രത്യേക സാമ്പത്തിക മേഖല, ഭാരതമാതാ കോളേജ്, ഐ.എം.ജി കവല, എന്നിവിടങ്ങളില്‍ നിന്ന് പുറപ്പെടുന്ന ജാഥ കാക്കനാട് ജങ്ഷനില്‍ എത്തിച്ചേരും. തുടര്‍ന്ന് മട്ടന്നൂര്‍ ശങ്കരന്‍കുട്ടി മാരാരും മക്കളായ ശ്രീകാന്ത്, ശ്രീരാജ് എന്നിവര്‍ ചേര്‍ന്ന് തായമ്പക അവതരിപ്പിക്കും.  
സപ്തംബര്‍ നാലിന് തൃക്കാക്കര നഗരസഭ കമ്മ്യൂണിറ്റി ഹാളില്‍ പൂക്കള മത്സരം നടക്കും. 19ന് വൈകിട്ട് മൂന്നിന് ചെമ്പ്മുക്കില്‍ നിന്നാരംഭിക്കുന്ന ഘോഷയാത്ര കളക്ടറേറ്റ് പരേഡ് ഗ്രൗണ്ടില്‍ സമാപിക്കും. പൊതുസമ്മേളനം മന്ത്രി കെ.ടി ജലീല്‍ ഉദ്ഘാടനം ചെയ്യും. തുടര്‍ന്ന് സിനിമാതാരം ഹരിശ്രീ അശോകന്‍ അവതരിപ്പിക്കുന്ന മെഗാഷോ 'കോമഡി ക്വട്ടേഷന്‍' നടക്കും. വിളംബരജാഥയില്‍ നഗരസഭാ പ്രദേശത്തെ ക്ലബുകള്‍ക്ക് പങ്കെടുക്കാമെന്ന് അധികൃതര്‍ പറഞ്ഞു.