നെടുമ്പാശ്ശേരി: ഒരാഴ്ച്ചത്തെ സന്ദര്‍ശനത്തിനായി ഇന്നലെ ലക്ഷദ്വീപിലേക്ക് പോയ അഡ്മിനിസ്‌ട്രേറ്റര്‍ പ്രഫുല്‍ പട്ടേല്‍ അവസാന നിമിഷം കൊച്ചി വഴിയുള്ള യാത്ര ഒഴിവാക്കി. ദാമന്‍ ദിയുവില്‍ നിന്നും ലക്ഷദ്വീപിലേക്ക് പോകുന്ന പ്രഫുല്‍ പട്ടേല്‍ ഇന്നലെ രാവിലെ 9.30ന് നെടുമ്പാശ്ശേരി വിമാനത്താവളത്തിലെത്തി 10.30ന് ഇവിടെ നിന്നും യാത്ര തിരിക്കാനായിരുന്നു തീരുമാനിച്ചിരുന്നത്.
ഇക്കാര്യം അഡ്മിനിസ്‌ട്രേറ്ററുടെ ഔദ്യോഗിക വെബൈ്‌സറ്റില്‍ വ്യക്തമാക്കുകയും ചെയ്തിരുന്നു. വിവരമറിഞ്ഞ്, ലക്ഷദ്വീപില്‍ നടപ്പിലാക്കുന്ന ജനദ്രോഹ നടപടികള്‍ക്കെതിരെ അഡ്മിനിസ്‌ട്രേറ്ററെ നേരില്‍ കണ്ട് പ്രതിഷേധം അറിയിക്കാന്‍ എം.പിമാരായ ഹൈബി ഈഡന്‍, ടി.എന്‍ പ്രതാപന്‍, അന്‍വര്‍ സാദത്ത് എം.എല്‍.എ എന്നിവര്‍ രാവിലെ തന്നെ വിമാനത്താവളത്തില്‍ എത്തിയിരുന്നു. ഒന്നര മണിക്കൂറോളം ജനപ്രതിനിധികള്‍ വിമാനത്താവളത്തിലെ അഭ്യന്തര ടെര്‍മിനലില്‍ കാത്തിരുന്നെങ്കിലും 10.30 ഓടെ അഡ്മിനിസ്‌ട്രേറ്റര്‍ ദാമന്‍ ദിയുവില്‍ നിന്നും നേരിട്ട് കവരത്തിയിലേക്ക് പോകുകയാണെന്ന അറിയിപ്പ് ലഭിക്കുകയായിരുന്നു. ലക്ഷദ്വീപ് അഡ്മിനിസ്‌ട്രേറ്റര്‍ കൊച്ചിയിലിറങ്ങാതെ ഒളിച്ചോടിയെന്ന് ടി.എന്‍ പ്രതാപന്‍ എം.പി പ്രതികരിച്ചു.