കോഴിക്കോട്: പ്ലസ് ടു പരീക്ഷാഫലമറിഞ്ഞപ്പോള്‍ ഫിനു ഓടിയെത്തി തനിക്ക് ജീവതാളം തിരികെ നല്‍കിയ വിഷ്ണുവിന്റെ കുടുംബത്തെ കാണാന്‍. വിഷ്ണുവിന്റെ അച്ഛനും അമ്മയ്ക്കും മധുരം നല്‍കി അവള്‍ തന്റെ വിജയം ആഘോഷിച്ചു.

ചക്കാലക്കല്‍ ഹയര്‍സെക്കന്‍ഡറി സ്‌കൂളിലെ വിദ്യാര്‍ഥിന് ഫിനു ഷെറിനാണ് തനിക്ക് ഹൃദയം നല്‍കിയ വിഷ്ണുവിന്റെ കുടുംബത്തെ കാണാനെത്തിയത്. വിഷ്ണുവിന്റെ കുടുംബം അന്ന് അങ്ങനെയൊരു തീരുമാനമെടുത്തില്ലായിരുന്നെങ്കില്‍ ഫിനുവിന്റെ ജീവന്‍ തന്നെ അപകടത്തിലാകുമായിരുന്നു. മസ്തിഷ്‌കമരണം സംഭവിച്ച വളയനാട് സ്വദേശി വിഷ്ണുവിന്റെ ഹൃദയവുമായാണ് ഫിനു ഷെറിനില്‍ ജീവിക്കുന്നത്.

ഒമ്പതാം ക്ലാസില്‍ പഠിക്കുമ്പോഴാണ് ഫിനുവിന്റെ ഹൃദയത്തിന് തകരാര്‍ കണ്ടെത്തിയത്. ഹൃദയം മാറ്റിവെക്കലല്ലാതെ മറ്റുവഴികളില്ലെന്ന് കണ്ടെത്തിയത് കോഴിക്കോട് ഗവ. മെഡിക്കല്‍ കോളേജിലെ ഹൃദ്രോഗവിദഗ്ധനായ ഡോ. രാജേഷ്. തുടര്‍ന്ന് പൊതുപ്രവര്‍ത്തകനായ സലീം മടവൂര്‍ ചെയര്‍മാനും മുസ്തഫ നുസരി വര്‍ക്കിങ് ചെയര്‍മാനും എം.എം. ഹബീബ് കണ്‍വീനറും എന്‍.കെ.സി. ബഷീര്‍ ട്രഷററുമായി ചികിത്സാകമ്മിറ്റി രൂപവത്കരിച്ചു. 56 ലക്ഷം രൂപയാണ് സുമനസ്സുകള്‍ നല്‍കിയത്. ഫിനു പഠിച്ച ചക്കാലക്കല്‍ ഹയര്‍സെക്കന്‍ഡറി സ്‌കൂളിലെ വിദ്യാര്‍ഥികള്‍ 13 ലക്ഷം രൂപ നല്‍കി.

കോഴിക്കോട് മെഡിക്കല്‍ കോളേജില്‍ മസ്തിഷ്‌കമരണം സംഭവിച്ച വളയനാട് സ്വദേശി വിഷ്ണുവിന്റെ കുടുംബം ഹൃദയം നല്‍കാന്‍ തയ്യാറായി. 2018 ല്‍കോഴിക്കോട് മെട്രോ കെയര്‍ ആശുപത്രിയിലെത്തിച്ച ഫിനു ഷെറിന് ഡോ. നന്ദകുമാറിന്റെ നേതൃത്വത്തിലുള്ള സംഘം വിഷ്ണുവിന്റെ ഹൃദയം തുന്നിപ്പിടിപ്പിക്കുകയായിരുന്നു.

രണ്ടുവര്‍ഷത്തിനുശേഷം തിരികെ സ്‌കൂളിലെത്തിയ ഫിനു എസ്.എസ്.എല്‍.സി.ക്ക് ഒമ്പത് എ പ്ലസുകളുമായാണ് വിജയിച്ചത്. ഒരു വര്‍ഷത്തെ എന്‍ട്രന്‍സ് പരിശീലനത്തിനുശേഷം നീറ്റ് പരീക്ഷ വഴി എം.ബി.ബി.എസിനു ചേരാനാണ് ഫിനുവിന്റെ ആഗ്രഹം.