ഷൊര്‍ണൂര്‍: കാരക്കാട് കൊടുക്കാട്ടു കോളനി, ലക്ഷംവീട്ട് കോളനി, തെക്കുപുറം എന്നീ പ്രദേശങ്ങളില്‍ കുടിവെള്ളം നിലച്ചിട്ട് നാലാഴ്ചയായി. വെള്ളം ലഭിക്കാത്തതില്‍ പ്രതിഷേധിച്ച് വാര്‍ഡ് കൗണ്‍സിലര്‍ കെ.മ ണികണ്ഠന്റെ നേതൃത്വത്തില്‍ ഇന്നലെ വാട്ടര്‍ അതോററ്റി അസി.എക്‌സിക്യൂട്ടീവ് ഓഫിസറുടെ ഓഫിസിനു മുന്നില്‍ നാട്ടുകാര്‍ കുത്തിയിരിപ്പ് സമരം നടത്തി. പിന്നീട് എക്‌സിക്യൂട്ടീവ് എന്‍ജിനിയര്‍മാരുമായി നടന്ന ചര്‍ച്ചയില്‍ രണ്ടു ദിവസത്തിനുള്ളില്‍ കുടിവെള്ളം ലഭിക്കുമെന്ന ഉറപ്പിന്മേല്‍ സമരം അവസാനിപ്പിക്കുകയായിരുന്നു. നഗരസഭാ ചെയര്‍പേഴ്‌സണ്‍ വി. വിമല, സി.പി.എം നേതാക്കളായ ദിന്‍ഷാദ്, നഗരസഭാ അംഗം എം. നാരായണന്‍ എന്നിവര്‍ ചര്‍ച്ച നടത്തി.