അമ്പലത്തറ: ഇരുപത് രൂപയല്ലേ വാടക...അമ്പതുണ്ട് ...ഇത്  വച്ചോളു മോനെ...നിങ്ങള്‍ ചെയ്യുന്നത് പുണ്യ കര്‍മമല്ലേ...ദൈവം നിങ്ങടെ കൂടെയുണ്ടാകും... ഇത് ഇന്നലെ അമ്പലത്തറ കേന്ദ്രീകരിച്ച് ഒരു കൂട്ടം ഓട്ടോ ഡ്രൈവര്‍മാര്‍  ചെയ്ത കാരുണ്യപ്രവര്‍ത്തനങ്ങള്‍ക്കിടയില്‍  അങ്ങോളമിങ്ങോളം കേട്ട  നാട്ടുകാരുടെയും യാത്രക്കാരുടേയും പിന്തുണയുള്ള വാക്കുകള്‍...  
ഡ്രൈവര്‍മാരുടെ ഈ കൂട്ടായ്മ മറ്റൊന്നിനും വേണ്ടിയല്ല. നാട്ടിലെ കാന്‍സര്‍ ബാധിച്ചു  ദുരിതം പേറുന്ന ചികില്‍സയ്ക്ക്  പണമില്ലാതെ ദിനങ്ങള്‍ തള്ളി നീക്കുന്ന ആറു രോഗികള്‍ക്ക് ഒരു കൈ സഹായത്തിനു വേണ്ടിയാണ്.
അതോടൊപ്പം സഹപ്രവര്‍ത്തകന്‍ കൂടിയായ പടന്നക്കാട്ടെ വിജയനും ഒരു കൈ സഹായം നല്‍കണം.
     അതിനാണ്  ഓടിക്കിട്ടുന്ന കാശ് കൊണ്ട് മാത്രം കുടുംബം പോറ്റുന്ന ഡ്രൈവര്‍മാര്‍  അതൊക്കെ മറന്ന് രോഗികളുടെ കണ്ണീരൊപ്പാന്‍ കൈകോര്‍ത്തത്.
യൂണിറ്റിനു കീഴിലുള്ള നാല്‍പത് ഓട്ടോറിക്ഷകളാണ് ഈ സല്‍ക്കര്‍മ്മത്തില്‍ കണ്ണിളായത്. അമ്പലത്തറ എസ്.ഐ രാജഗോപാലന്‍ കാരുണ്യയാത്ര ഫ്‌ളാഗ്  ഓഫ് ചെയ്തു.
രാജന്‍ മഴുവെടുത്തുമൂല അധ്യക്ഷത വഹിച്ചു. യൂണിറ്റിനു കീഴിലുള്ള അമ്പലത്തറ, പാറപ്പള്ളി, കല്ലാന്തോല്‍ എന്നിവിടങ്ങളിലെ ഓട്ടോകളാണു കാരുണ്യയാത്രയില്‍ പങ്കാളികളായത്.