കണ്ണൂര്‍: കാല്‍നൂറ്റാണ്ട് മുന്‍പ് തൃശൂരില്‍ നിന്ന് കാണാതായ യുവാവിനെ കണ്ണൂര്‍ പൊലിസ് കണ്ടെത്തി ബന്ധുക്കളെ ഏല്‍പിച്ചു. 26 വര്‍ഷം മുന്‍പ് കാണാതായ യുവാവിനെയാണ് ബീറ്റ് പരിശോധനയില്‍ പൊലിസ് കണ്ടെത്തിയത്. തൃശൂരില്‍ നിന്നെത്തിയ സഹോദരന്‍ പൊലിസിനു നന്ദിയറിയിച്ച് യുവാവുമായി മടങ്ങി.

പുതുക്കാട് പൊലിസ് സ്റ്റേഷന്‍ പരിധിയില്‍ നിന്ന് കാണാതായ വാസുവിന്റെ മകന്‍ എം.പി ബാബു (43)വിനെയാണ് ടൗണ്‍ സ്റ്റേഷനിലെ പൊലിസുകാരായ രാജേഷും ഷിജുവും ബീറ്റ് പരിശോധനക്കിടെ ലോഡ്ജില്‍ കണ്ടെത്തിയത്. ചോദ്യം ചെയ്തപ്പോള്‍ കുറേക്കാലമായി വീടുവിട്ടിട്ടെന്ന് ബാബു പറഞ്ഞു. വിലാസം നോക്കി ടൗണ്‍ പൊലിസ് പുതുക്കാട് പൊലിസുമായി ബന്ധപ്പെട്ടു. ബാബുവിനെ കാണാതായതുമായി ബന്ധപ്പെട്ട് കേസുണ്ടെന്ന് അറിയിഞ്ഞതിനെ തുടര്‍ന്ന് പുതുക്കാട് പൊലിസ് ബാബുവിന്റെ ബന്ധുക്കളെ കണ്ടെത്തി. കഴിഞ്ഞ ദിവസം ബാബുവിന്റെ സഹോദരന്‍ കണ്ണൂരിലെത്തി ബാബുവുമായി നാട്ടിലേക്ക് മടങ്ങി.
അതിഥി തൊഴിലാളികളെയും അപരിചിതരെയും കണ്ടെത്താനുള്ള പരിശോധനയിലാണ് കാല്‍നൂറ്റാണ്ട് മുന്‍പ് കാണാതായ ബാബുവിനെ പൊലിസ് കണ്ടെത്തിയത്. അമ്മയുമായി വീഡിയോ കാള്‍ നടത്തിയ ശേഷം കണ്ണൂര്‍ പൊലിസിനു നന്ദി അറിയിച്ചാണ് ബാബുവും സഹോദരനും മടങ്ങിയത്.