വാഷിങ്ടണ്‍: തീവ്രവാദത്തിനെതിരേ പാകിസ്താന്‍ പോരാടണമെന്ന് പെന്റഗണ്‍. പാകിസ്താനിനുള്ള 300 ദശലക്ഷം ഡോളറിന്റെ സൈനിക സഹായം യു.എസ് റദ്ദാക്കിയത് ഇക്കാരണത്താലാണെന്നും പെന്റഗണ്‍ സൂചന നല്‍കി. യു.എസിന്റെ ഭീകരവാദ പട്ടികയില്‍പ്പെട്ട ഹഖാനി ശൃംഖലയ്‌ക്കെതിരേ പാകിസ്താന്‍ നടപടികള്‍ എടുക്കുന്നില്ലെന്ന യു.എസ് കോണ്‍ഗ്രസിന്റെ അതൃപ്തിയാണ് പാകിസ്താനെതിരേയുള്ള സഹായം നല്‍കുന്നതിന് തടസ്സമായത്.
പാകിസ്താനൊപ്പം തീവ്രവാദ വിരുദ്ധ പ്രവര്‍ത്തനങ്ങള്‍ക്ക് യു.എസ് എപ്പോഴുമുണ്ടാകും. എന്നാല്‍ ചിലകാര്യങ്ങളില്‍ പാകിസ്താനിന്റെ താല്‍പര്യം യു.എസ് നിലപാടിനോട് യോജിച്ചുപോകുന്നില്ലെന്ന് പെന്റഗണ്‍ പ്രസ് സെക്രട്ടറി പീറ്റര്‍ കുക്ക് പറഞ്ഞു.

അഫ്ഗാനിസ്ഥാനില്‍ ഹഖാനി ശൃംഖല നിരവധി അമേരിക്കക്കാരെ തട്ടിക്കൊണ്ടുപോയിട്ടുണ്ട്. 2008 ല്‍ കാബൂളിലെ ഇന്ത്യന്‍ മിഷനില്‍ ഹഖാനി നടത്തിയ വ്യോമാക്രമണത്തില്‍ 58 പേര്‍ കൊല്ലപ്പെട്ടിരുന്നു.