പെരിങ്ങോം: വീട്ടുമുറ്റത്തെ ചെങ്കല്‍പാറയില്‍ മണ്ണിട്ട് നികത്തി റിട്ടയേഡ് അധ്യാപകന്‍ നടത്തിയ ജൈവനെല്‍കൃഷിയുടെ വിളവെടുപ്പ് നടന്നു.
പെരിങ്ങോം ചിലകിലെ റിട്ടയേഡ് അധ്യാപകന്‍ കെ.പി സുകുമാരന്‍ നമ്പ്യാര്‍ പുതുതായി പണിത വീടിനു മുന്നിലെ 17 സെന്റ് സ്ഥലത്തെ ചെങ്കല്‍ പാറയില്‍ നടത്തിയ കരനെല്‍കൃഷിയുടെ വിളവെടുപ്പ് പെരിങ്ങോം വയക്കര കൃഷി ഓഫിസര്‍ കെ.എം മോഹനന്‍ നിര്‍വഹിച്ചു. ഔഷധ ഗുണമുള്ളതും മികച്ച വിളവ് നല്‍കുന്നതുമായ നവരയാണ് വിത്ത്. ചെങ്കല്‍പാറയില്‍ മണ്ണിട്ട് നികത്തിയായിരുന്നു നെല്‍കൃഷിയിലെ ഈ പരീക്ഷണം. വിളവെടുപ്പ് ചടങ്ങിന് കൃഷിവകുപ്പ് ജീവനക്കാരനായ മകന്‍ ജയരാജുള്‍പ്പെടെയുള്ള കുടുംബാംഗങ്ങളും പങ്കെടുത്തു.