തിരുവനന്തപുരത്ത് സഹോദരിമാര്‍ക്ക് ക്രൂരപീഡനം

തിരുവനന്തപുരം: പൂവ്വാറില്‍ സ്‌കൂള്‍ വിദ്യാര്‍ത്ഥികളായ സഹോദരിമാരെ ലൈംഗികമായി പീഡിപ്പിച്ചതായി പരാതി. സംഭവത്തില്‍ പൂവാര്‍ സ്വദേശിയായ മുന്‍ സൈനികന്‍ ഷാജി (56)യെ പൊലിസ് അറസ്റ്റ് ചെയ്തു.

പത്തും പന്ത്രണ്ടും വയസുള്ള സഹോദരിമാരാണ് പീഡനത്തിനിരയായത്. ഇളയ പെണ്‍കുട്ടി നേരിട്ടത് ക്രൂരമായ ലൈംഗിക പീഡനമാണ്. കുടുംബത്തിന്റെ ദാരിദ്ര്യം മുതലെടുത്താണ് പ്രതി പെണ്‍കുട്ടികളെ പീഡിപ്പിച്ചതെന്നാണ് വിവരം. സ്‌കൂളിലെ കൗണ്‍സിലിംഗിനിടെയാണ് വിവരം പുറത്തറിഞ്ഞത്.

കഴിഞ്ഞ ദിവസമാണ് വനിത ശിശു വികസന വകുപ്പില്‍ നിന്നുള്ള കൗണ്‍സിലര്‍ സ്‌കൂളിലെത്തിയത്. മൂത്ത പെണ്‍കുട്ടിയാണ് വിവരം പറഞ്ഞത്. ഇളയ പെണ്‍കുട്ടിയോട് കൂടി ചോദിച്ച് വിവരങ്ങള്‍ ഉറപ്പാക്കിയ ശേഷം കൗണ്‍സിലര്‍ വിവരം സ്‌കൂള്‍ അധികൃതരെ അറിയിച്ചു. ഇവര്‍ പൊലീസില്‍ വിവരം അറിയിക്കുകയായിരുന്നു. ഉടന്‍ തന്നെ പൊലീസ് ഷാജിയെ പിടികൂടി.