യുഎഇക്ക് ആശ്വസിക്കാം; സുഹൈൽ അടുത്ത ആഴ്ച എത്തും, കൃഷിയിലേക്ക് കണ്ണും നട്ട് രാജ്യം

അബുദാബി: യുഎഇക്ക് ആശ്വാസമായി സുഹൈൽ നക്ഷത്രത്തിന്റെ രൂപം വെളിവാകുന്നു. വേനൽക്കാലത്തിന്റെ അവസാനം അറിയിക്കുന്ന സുഹൈൽ നക്ഷത്രം ഓഗസ്റ്റ് 24 ന് പുലർച്ചെ കാണപ്പെടുമെന്ന് എമിറേറ്റ്സ് അസ്ട്രോണമിക്കൽ സൊസൈറ്റി ചെയർമാൻ ഇബ്രാഹിം അൽ ജർവാൻ വെളിപ്പെടുത്തി. ഇതോടെ രാജ്യം കനത്ത ചൂടിൽ നിന്ന് സാധാരണ നിലയിലേക്ക് എത്തും.

അറേബ്യൻ ഉപദ്വീപിന്റെ മധ്യഭാഗത്ത് ആയാണ് ഓഗസ്റ്റ് 24 ന് പുലർച്ചെ സുഹൈൽ നക്ഷത്രം ഉദിക്കുക. സുഹൈൽ ഉദിച്ച് നാൽപത് ദിവസത്തിന് ശേഷമായിരിക്കും ശരത്കാലം ആരംഭിക്കുക. "സുഹൈൽ" ന്റെ വരവ് "സഫ്രിയ" സീസണിന്റെ വരവ് സൂചിപ്പിക്കുന്നു, അത് ഏകദേശം 40 ദിവസം നീണ്ടുനിൽക്കും. ഈ കാലയളവിൽ, വായു അസ്വാസ്ഥ്യമായി തുടരുന്നു.

പിന്നീട് വരുന്ന ആഴ്‌ചകളിലുടനീളം സുഹൈൽ ആകാശത്ത് തെളിഞ്ഞുകാണാം. ഈ സമയത്ത് അന്തരീക്ഷം മിതമായ താപനിലയ്ക്കും കാർഷിക പ്രവർത്തനങ്ങളുടെ പുനരുജ്ജീവനത്തിനും വഴിയൊരുക്കുന്നത് ആയിരിക്കും. ഈ സമയത്താകും രാജ്യത്തിന്റെ വിവിധ ഭാഗങ്ങളിൽ കൃഷിയാരംഭിക്കുക. ഒക്‌ടോബർ രണ്ട് മുതൽ രാത്രിയും പകലും തുല്യമാകുമെന്നാണ് കരുതുന്നത്. സമൃദ്ധമായ വിളവെടുപ്പ് ഉറപ്പാക്കാൻ തണുപ്പിക്കുന്ന കാലാവസ്ഥയും ഫലഭൂയിഷ്ഠമായ സാഹചര്യങ്ങളും പ്രയോജനപ്പെടുത്തി കർഷകർ ആദ്യ വിത്ത് വിതയ്ക്കുന്ന സമയമായാണ് ഈ സമയം കണക്കാക്കുന്നത്.

"യമനിലെ നക്ഷത്രം" എന്നറിയപ്പെടുന്ന സുഹൈൽ അറബ് ജനതയുടെ പാരമ്പര്യവുമായി ബന്ധപ്പെട്ടതാണ്. "ദുരൂർ" കലണ്ടറിന്റെ സമയവുമായി പൊരുത്തപ്പെടുന്നതാണ് സുഹൈൽ നക്ഷത്രം. നൂറ് ദിവസം നീണ്ടുനിൽക്കുന്ന വ്യത്യസ്ത ഘട്ടങ്ങളായി വിഭജിച്ചതാണ് ഈ കലണ്ടർ. അറബ് പാരമ്പര്യ പ്രകാരം, സുഹൈലിന്റെ ഉദയം വേനൽക്കാലത്തിന്റെ അവസാനവും വളർച്ചയുടെയും സമൃദ്ധിയുടെയും ഒരു പുതിയ സീസണിന്റെ തുടക്കമാണ്.