തൊട്ടില്‍പാലത്ത് പെണ്‍കുട്ടിയെ തട്ടിക്കൊണ്ടുപോയി വീട്ടില്‍ പൂട്ടിയിട്ട് പീഡിപ്പിച്ച സംഭവം: പ്രതി കസ്റ്റഡിയില്‍

കോഴിക്കോട്: തൊട്ടില്‍പാലം കുണ്ടുതോടില്‍ 19 കാരിയായ കോളജ് വിദ്യാര്‍ഥിനിയെ തട്ടിക്കൊണ്ടുപോയി പീഡിപ്പിച്ച് മുറിയില്‍ പൂട്ടിയിട്ട സംഭവത്തില്‍ പ്രതി കസ്റ്റഡിയില്‍. കുണ്ടുതോട് സ്വദേശിയായ ജുനൈദ് ആണ് പിടിയിലായത്. വടകരയില്‍ വെച്ചാണ് പ്രതിയെ കസ്റ്റഡിയിലെടുത്തത്. പ്രതിക്കായി പൊലിസ് ലുക്ക്ഒൗട്ട് നോട്ടിസ് പുറപ്പെടുവിച്ചിരുന്നു.

നാദാപുരം ഡി.വൈ.എസ്.പിയുടെ നേതൃത്വത്തിലുള്ള സംഘമാണ് ഇയാളെ പിടികൂടിയിരിക്കുന്നത്. ഇപ്പോള്‍ പൊലീസ് കസ്റ്റഡിയിലാണ് ജുനൈദ് ഉള്ളത്. പ്രതിയെ ചോദ്യം ചെയ്ത് വരികയാണ്. പെണ്‍കുട്ടിയെ പൂട്ടിയിട്ട മുറിയില്‍ നിന്ന് എം.ഡി.എം.എ അടക്കം കണ്ടെത്തിയിരുന്നു.

കഴിഞ്ഞ ബുധനാഴ്ചയാണ് പത്തൊന്‍പതുകാരിയെ കോളജ് ഹോസ്റ്റലില്‍ നിന്ന് കാണാതായത്. മൊബൈല്‍ ഫോണ്‍ കേന്ദ്രീകരിച്ച് നടത്തിയ അന്വേഷണത്തിലാണ് ജുനൈദിന്റെ വീട്ടിലെ മുറിയില്‍ പൂട്ടിയിട്ട നിലയില്‍ വ്യാഴാഴ്ച പെണ്‍കുട്ടിയെ കണ്ടെത്തിയത്. പൊലീസെത്തും മുന്‍പ് പ്രതി കടന്നു കളഞ്ഞിരുന്നു. വിദ്യാര്‍ഥിനിയുടെ മൊബൈല്‍ കേന്ദ്രീകരിച്ച് നടത്തിയ അന്വേഷണത്തിലാണ് പെണ്‍കുട്ടിയെ കണ്ടെത്തിയത്.