തിരുവനന്തപുരം •തലസ്ഥാനത്ത് പൊലിസ് അസോസിയേഷൻ സമ്മേളനത്തിനെത്തിയ പൊലിസുകാർ വീട്ടിലേക്കുള്ള വഴിയിൽ മൂത്രം ഒഴിച്ചത് ചോദ്യം ചെയ്ത യുവാവിനെ മർദിച്ച സംഭവത്തിൽ വകുപ്പുതല നടപടി. മൂന്നു പൊലിസുകാരെ സസ് പെൻഡ് ചെയ്തു.

കോട്ടയം ചങ്ങനാശേരി ട്രാഫിക് പൊലിസ് ഉദ്യോഗസ്ഥൻ നിവാസ്, സീനിയർ സി.പി.ഒ ജിബിൻ, ഡ്രൈവർ പി.പി പ്രശാന്ത് എന്നിവരെയാണ് കോട്ടയം എസ്.പി സസ്‌പെൻഡ് ചെയ്തത്.
വകുപ്പുതല പ്രാഥമിക അന്വേഷണത്തിന്റെ അടിസ്ഥാനത്തിലാണ് നടപടി. റെയിൽവേ ജീവനക്കാരനായ യുവാവിനാണ് മർദനമേറ്റത്.
കിളിമാനൂർ ബിവറേജസ് ഒൗട്ട്ലെറ്റിന് സമീപം വീട്ടിലേക്കുള്ള സ്വകാര്യ വഴിയിൽ ചങ്ങനാശ്ശേരിയിൽ നിന്നെത്തിയ മൂന്ന് പൊലിസുകാർ മൂത്രമൊഴിക്കുകയായിരുന്നു.
ഇത് വീട്ടുടമയായ രജീഷ് ചോദ്യംചെയ്യുകയും വാക്കേറ്റത്തിനിടെ ഇവർ യുവാവിനെ മർദിച്ചെന്നുമാണ് പരാതി.

ടെംപോ ട്രാവറിലെത്തിയ പൊലിസുകാർ മദ്യപിച്ചിരുന്നെന്നും അടുത്തുള്ള സ്റ്റേഷനിൽ പരാതി നൽകിയെങ്കിലും കേസെടുക്കാൻ പൊലിസ് ആദ്യം വിസമ്മതിച്ചെന്നും പരാതിക്കാരനായ രജീഷ് ആരോപിച്ചിരുന്നു.