തൃപ്രയാര്‍: നാട്ടിക ഗ്രാമപഞ്ചായത്ത് പൊതുമരാമത്ത് പണികള്‍ക്കുള്ള പദ്ധതി പണം യു.ഡി.എഫ് അംഗങ്ങളുടെ വാര്‍ഡുകളിലേക്ക് വിഭജിച്ച് നല്‍കിയെന്നാരോപിച്ച് പ്രതിപക്ഷമായ എല്‍.ഡി.എഫ് അംഗങ്ങളും ബി.ജെ.പി അംഗവും ഭരണസമിതി യോഗത്തില്‍ നിന്ന് ഇറങ്ങിപ്പോയി.
യു.ഡി.എഫ് അംഗങ്ങള്‍ പ്രതിനിധാനം ചെയ്യുന്ന വാര്‍ഡുകളില്‍ ആറു മുതല്‍ ഇരുപത്തി മൂന്നു ലക്ഷം രൂപ വരെ ഫണ്ട് അനുവദിച്ചതായി എല്‍.ഡി.എഫ് അംഗങ്ങള്‍ ആരോപിച്ചു. ശോചനീയാവസ്ഥയിലായ റോഡുകള്‍ പരിഗണനക്കായി സമര്‍പ്പിച്ചെങ്കിലും അവഗണിക്കുകയായിരുന്നുവെന്നും എല്‍.ഡി.എഫ് അംഗങ്ങള്‍ കുറ്റപ്പെടുത്തി. ഏതാനും ചില പദ്ധതികള്‍ ഭരണസമിതിയില്‍ സമര്‍പ്പിച്ചെങ്കിലും സബ്ബ് സെന്ററിന്റെ അറ്റകുറ്റപ്പണി മാത്രമാണ് അംഗീകരിക്കപ്പെട്ടതെന്ന് ബി.ജെ.പിയുടെ രണ്ടാം വാര്‍ഡംഗമായ സജിനി ഉണ്ണ്യാരംപുരയ്ക്കല്‍ പറഞ്ഞു.
ഭരണസമിതിയുടെ തെറ്റായ നടപടി പിന്‍വലിച്ച് പദ്ധതി ഫണ്ട് കൃത്യമായി വിഭജിക്കണമെന്ന് സി.പി.എം ബി.ജെ.പി നേതാക്കളായ കെ.ബി ഹംസ, എ.കെ ചന്ദ്രശേഖരന്‍ എന്നിവര്‍ ആവശ്യപ്പെട്ടു.
നടപടി പിന്‍വലിച്ചില്ലെങ്കില്‍ ശക്തമായ സമരപരിപാടികള്‍ നടത്തുമെന്നും നേതാക്കള്‍ മുന്നറിയിപ്പ് നല്‍കി.
പ്രതിപക്ഷാരോപണം ശരിയല്ലെന്ന് പഞ്ചായത്ത് പ്രസിഡന്റ്
തൃപ്രയാര്‍: നാട്ടിക പഞ്ചായത്ത് ഭരണസമിതിക്കെതിരെയുള്ള പ്രതിപക്ഷാരോപണം ശരിയല്ലെന്ന് പഞ്ചായത്ത് പ്രസിഡന്റ് പി വിനു വ്യക്തമാക്കി.
പശ്ചാത്തല മേഖലയിലെ ഫണ്ട് വാര്‍ഡ് അടിസ്ഥാനത്തിലല്ല പഞ്ചായത്ത് അടിസ്ഥാനത്തിലാണ് ചെലവഴിക്കുകയെന്ന് പഞ്ചായത്ത് പ്രസിഡന്റ് പറഞ്ഞു. ഗ്രാമസഭയിലും വര്‍ക്കിങ് ഗ്രൂപ്പിലും ഉയര്‍ന്നു വന്ന നിര്‍ദേശം വികസന സ്റ്റാന്‍ഡിങ് കമ്മിറ്റി ചര്‍ച്ച ചെയ്ത് മുന്‍ഗണന നല്‍കിയതനുസരിച്ചാണ് ഫണ്ട് വകയിരുത്തിയതെന്ന് പ്രസിഡന്റ് ചൂണ്ടിക്കാട്ടി.
കഴിഞ്ഞ പഞ്ചായത്ത് യോഗത്തില്‍ ഏകകണ്ഠമായാണ് ഇക്കാര്യത്തിനായി വികസന സ്റ്റാന്‍ഡിങ് കമ്മിറ്റിയെ ചുമതലപ്പെടുത്തിയതെന്ന് പ്രതിപക്ഷം മറക്കരുതെന്ന് പ്രസിഡന്റ് പി വിനു പറഞ്ഞു. ഫണ്ട് വിതരണത്തില്‍ രാഷ്ട്രീയ വിവേചനമില്ല.
ഇതുവരെ കോണ്‍ഗ്രസ് ജയിക്കാത്ത വാര്‍ഡില്‍ മെമ്പര്‍ സതീശന്റെ വാര്‍ഡിലേക്ക് റോഡ് നിര്‍മാണത്തിന് 13 ലക്ഷവും ഹോമിയോ ആശുപത്രിക്ക് ഒന്‍പത് ലക്ഷവും അനുവദിച്ചത് ഇതിനൊരു ഉദാഹരണമാണന്നു പ്രസിഡന്റ് വ്യക്തമാക്കി.