ഭണ്ഡാരം കുത്തിത്തുറന്ന് മോഷണം;
പ്രതി മണിക്കൂറുകള്‍ക്കുള്ളില്‍ പിടിയില്‍
വാടാനപ്പള്ളി: തളിക്കുളം എരണേഴത്ത് ക്ഷേത്രത്തില്‍ ഭണ്ഡാരം കുത്തിത്തുറന്ന് മോഷണം. മണിക്കൂറുകള്‍ക്കുള്ളില്‍ പ്രതിയെ പിടികൂടി. തളിക്കുളം തബാന്‍ കടവില്‍ താമസിക്കുന്ന കണ്ണിച്ചി വീട്ടില്‍ വിനീഷ് കുമാര്‍ (24) നെയാണ് വലപ്പാട് പൊലിസ് പിടികൂടിയത്.
ഇയാളില്‍ നിന്ന് ഭണ്ഡാരത്തില്‍നിന്ന് മോഷ്ടിച്ച അറുനൂറ്റി എഴുപത്തി ഒന്ന് രൂപയുടെ നോട്ടും കണ്ടെത്തി. കാറില്‍ വരികയായിരുന്ന സമീപവാസിയായ യുവാവ്  അസമയത്ത് എരണേഴത്ത് ക്ഷേത്രത്തിനു സമീപം യുവാവിനെ കണ്ടപ്പോള്‍ സംശയത്തെ തുടര്‍ന്ന് കാര്‍ നിര്‍ത്തിയതോടെ യുവാവ് ഓടി രക്ഷപ്പെട്ടു. വിവരമറിഞ്ഞെത്തിയ വലപ്പാട് എസ്.ഐ പി.ജി മധുവിന്റെ നേതൃത്വത്തിലുള്ള പൊലിസ് യുവാവിനെ   കസ്റ്റഡിയിലെടുത്തു. തുടര്‍ന്ന് നടത്തിയ ചോദ്യം ചെയ്യലില്‍ യുവാവ് ഭണ്ഡാരം കുത്തിതുറന്നതു സമ്മതിക്കുകയും യുവാവില്‍ നിന്നും പണം കണ്ടെടുക്കുകയും ചെയ്തു. പ്രതിയെ പിടികൂടിയ സംഘത്തില്‍ വലപ്പാട് എ.എസ്.ഐ ടോണി, ജു.എസ്.ഐ സുനില്‍ കുമാര്‍, സി.പി.ഒ.മാരായ അനില്‍, ഷൈന്‍, മിധുന്‍ ലാല്‍, ഹോം ഗാര്‍ഡ് വേണു എന്നിവരും ഉണ്ടായിരുന്നു.