കണ്ണൂര്‍: അഞ്ചുമാസമായി ശമ്പളമില്ലാത്തതിനാല്‍ സംസ്ഥാനത്തെ 325 ഏകധ്യാപക വിദ്യാലയങ്ങളിലെ അധ്യാപകരുടെ കുടുംബം പട്ടിണിയില്‍. ഇക്കുറി ഇവര്‍ക്ക് ഓണമുണ്ണണമെങ്കില്‍ സര്‍ക്കാര്‍ കനിയണം. കഴിഞ്ഞ മാര്‍ച്ചുമുതലാണ് ശമ്പളം മുടങ്ങിയിരിക്കുന്നത്.

കടം വാങ്ങി ജീവിതച്ചെലവുകള്‍ നടത്തിയ അധ്യാപകരുടെ ജീവിതം ഇപ്പോള്‍ ദുരിത പൂര്‍ണമായിരിക്കുകയാണ്. തുച്ഛമായ ശമ്പളത്തിന് തൊഴിലെടുക്കുന്ന ഇവര്‍ക്ക് മനുഷ്യാവകാശ കമ്മിഷന്റെ നിര്‍ദേശ പ്രകാരമാണ് 2015 സെപ്തംബറില്‍ 10,000 രൂപ മാസ ശമ്പളമാക്കിയത്. 2012 ല്‍ 3000 രൂപയുണ്ടായിരുന്നത് പിന്നീട് 5000 രൂപയായി വര്‍ധിപ്പിച്ചിരുന്നു.

1997 ലാണ് സംസ്ഥാനത്ത് ഏകാധ്യാപക വിദ്യാലയങ്ങള്‍ ആരംഭിച്ചത്. 2003 വരെ ഡി.പി.ഇ.പി യുടേയും 2011 വരെ എസ്.എസ്.എ യുടേയും സഹായത്തോടെയാണ് പ്രവര്‍ത്തിച്ചിരുന്നത്.

2011 ല്‍ പൊതുവിദ്യാഭ്യാസ വകുപ്പ് ഏറ്റെടുത്തതോടേയാണ് വിദ്യാലയങ്ങള്‍ക്ക് ശനിദശയാരംഭിച്ചത്. നന്നായി പ്രവര്‍ത്തിച്ചിരുന്ന സ്‌കൂളുകളെ എല്‍.പി സ്‌കൂളുകളാക്കിയെങ്കിലും 19 വര്‍ഷത്തോളമായി ഏക ആശ്രയമായി കഴിഞ്ഞിരുന്ന അധ്യാപകരുടെ പുനരധിവാസത്തിന് വേണ്ടി സര്‍ക്കാര്‍ ഒന്നും ചെയ്തില്ല.

ഏകാധ്യാപകര്‍ക്ക് വേണ്ടത്ര യോഗ്യതയില്ലെന്നായിരുന്നു സര്‍ക്കാര്‍ വാദം. എസ്.എസ്.എല്‍.സി യോഗ്യതയുള്ളവര്‍ക്ക് പരിശീലനം നല്‍കിയാണ് ഏകാധ്യാപകരാക്കിയിരിക്കുന്നത്. ഇവര്‍ക്ക് പ്രൈമറി സ്‌കൂള്‍ അധ്യാപകരുടെ ശമ്പളം നല്‍കണമെന്നാണ് ആവശ്യമുയരുന്നത്.
പ്രാഥമികവിദ്യാഭ്യാസ സൗകര്യങ്ങളില്ലാത്ത പ്രദേശങ്ങളില്‍ വനത്തിനുള്ളിലും ഒറ്റപ്പെട്ട ആദിവാസി ഗ്രാമങ്ങളിലുമാണ് ഏകാധ്യാപക വിദ്യാലയങ്ങള്‍ പ്രവര്‍ത്തിക്കുന്നത്. ഒന്നു മുതല്‍ നാലുവരേയുള്ള ക്ലാസുകളിലെ കുട്ടികളെ ഒരു ക്ലാസ്മുറിയിലിരുത്തി പഠിപ്പിക്കുന്ന അധ്യാപകന്‍ അഞ്ചും പത്തും കിലോമീറ്റര്‍ ദൂരം കാട്ടിലൂടേയും ദുര്‍ഘടമായ വഴിയിലൂടേയും നടന്നാണ്് സ്‌കൂളിലെത്തുന്നത്. ഇത്തരം വിദ്യാലയങ്ങളില്‍ പഠിക്കുന്നത് ആദിവാസി പിന്നാക്ക വിഭാഗങ്ങളില്‍പ്പെട്ട കുട്ടികളാണ്.