കൊച്ചി: ഫോര്‍ട്ട് കൊച്ചിയില്‍ മത്സ്യത്തൊഴിലാളിക്ക് കടലില്‍ വെച്ച് വെടിയേറ്റു. ആലപ്പുഴ അന്ധകാരനഴി സ്വദേശി സെബാസ്റ്റ്യനാണ് വെടിയേറ്റത്. മീന്‍പിടിത്തം കഴിഞ്ഞ് ബോട്ട് തീരത്തോട് അടുപ്പിക്കുന്നതിനിടെ ഫോര്‍ട്ട് കൊച്ചിയിലെ നേവിയുടെ ക്വാര്‍ട്ടേഴ്സിന് സമീപത്തുവച്ചാണ് സെബാസ്റ്റ്യന് വെടിയേറ്റത്. രാവിലെ 11.30 യോടെയാണ് സംഭവം.
ചെവിയുടെ ഭാഗത്തായി വെടിയേറ്റ സെബാസ്റ്റിയന്‍ ഉടന്‍ തന്നെ നിലത്തുവീണതിനെതുടര്‍ന്ന് ഫോര്‍ട്ട് കൊച്ചിയിലെ ആശുപത്രിയില്‍ പ്രവേശിപ്പിച്ചു. സംഭവം നടന്നതിന് തൊട്ടരികില്‍ നേവി ഉദ്യോഗസ്ഥര്‍ പരിശീലനം നടത്തുന്നതിനിടെ, വെടിയുണ്ട അബദ്ധത്തില്‍തട്ടി തെറിച്ച് സെബാസ്റ്റ്യന്റെ ചെവിയില്‍ പതിച്ചതാവാമെന്നാണ് പൊലീസിന്റെ പ്രാഥമിക നിഗമനം. സംഭവത്തില്‍ പൊലീസ് അന്വേഷണം ആരംഭിച്ചു.