ആലുവയില്‍ നാലാം ക്ലാസുകാരിയെ പീഡിപ്പിച്ച സംഭവം: പ്രതി പറശ്ശാല സ്വദേശി സതീശെന്ന് സൂചന

കൊച്ചി: ആലുവയില്‍ ഒമ്പത് വയസുകാരിയെ പീഡിപ്പിച്ച പ്രതിയെ തിരിച്ചറിഞ്ഞു. പാറശ്ശാല ചെങ്കല്‍ സ്വദേശി സതീശ് ആണെന്നാണ് സൂചന. കൊക്ക് സതീശ് എന്നറിയപ്പെടുന്ന ഇയാള്‍ സ്ഥിരം കുറ്റവാളിയാണ്. എറണാകുളം ജില്ലയില്‍ മാത്രം ഇയാള്‍ക്കെതിരെ 10 കേസുകളുണ്ട്.

ഇയാളെ കണ്ടെത്താനുള്ള അന്വേഷണം പുരോഗമിക്കുകയാണ്. പ്രതി എറണാകുളത്ത് തന്നെയുണ്ടെന്ന നിഗമനത്തിലാണ് പൊലിസ്. അതേസമയം ഇയാളുടെ സ്വദേശമായ ചെങ്കലിലും പൊലിസ് അന്വേഷിക്കുന്നുണ്ട്. ഏറെക്കാലമായി ഇയാള്‍ എറണാകുളത്താണുള്ളത് എന്നാണ് സൂചന.

വ്യാഴാഴ്ച പുലര്‍ച്ചെയാണ് ഒമ്പത് വയസുകാരിയെ തട്ടിക്കൊണ്ടുപോയി പീഡിപ്പിച്ചത്. പ്രതിയെ കുറിച്ച് സി.സി.ടി.വി ദൃശ്യങ്ങളില്‍നിന്ന് പൊലിസിന് പ്രാഥമിക സൂചനകള്‍ ലഭിച്ചിരുന്നു. കുട്ടിയും ദൃക്‌സാക്ഷിയും പ്രതിയെ തിരിച്ചറിഞ്ഞത് പൊലിസിന് സഹായകരമായി. പ്രതി ജില്ല വിട്ടുപോകാതിരിക്കാന്‍ വിപുലമായ സുരക്ഷയാണ് പൊലിസ് ഒരുക്കിയിട്ടുള്ളത്. പാറശ്ശാല പൊലിസും അന്വേഷണം ആരംഭിച്ചിട്ടുണ്ട്.