2000 പൊതുഇടങ്ങളില്‍ കൂടി സൗജന്യ വൈഫൈ, പദ്ധതിക്ക് സര്‍ക്കാരിന്റെ ഭരണാനുമതി

തിരുവനന്തപുരം : സംസ്ഥാന സര്‍ക്കാരിന്റെ കെ ഫൈ പദ്ധതി വഴി 2000 പൊതുഇടങ്ങളില്‍ കൂടി ഇനി സൗജന്യ വൈഫൈ ലഭ്യമാകും. ഐ.ടി മിഷന്‍ മുഖേന നടപ്പാക്കുന്ന പദ്ധതിക്ക് 20 കോടി രൂപയുടെ ഭരണാനുമതി നല്‍കി. നേരത്തെ ഈ പദ്ധതിയനുസരിച്ച് നിരവധി ബസ് സ്റ്റാന്‍ഡുകള്‍, ജില്ലാ ഭരണകേന്ദ്രങ്ങള്‍, പഞ്ചായത്ത് കേന്ദ്രങ്ങള്‍, പാര്‍ക്കുകള്‍, പ്രധാന സര്‍ക്കാര്‍ ഓഫീസുകള്‍, ലൈബ്രറികള്‍, പ്രധാന സര്‍ക്കാര്‍ ആശുപത്രികള്‍ എന്നിവിടങ്ങളില്‍ ഇതിനകം സൗജന്യ വൈഫൈ സൗകര്യം ഒരുക്കിയിരുന്നു. ഇതിന് പുറമേയാണ് പുതിയ 2000 വൈഫൈ ഹോട്ട്‌സ്‌പോട്ടുകള്‍ കൂടി ഒരുങ്ങുന്നത്.

സാങ്കേതിക വിദ്യയുടെ ഗുണഫലം ലഭ്യമാക്കുന്നതോടൊപ്പം സര്‍ക്കാര്‍ സേവനങ്ങള്‍ സുതാര്യവും അനായാസവുമായി എല്ലാ ജനവിഭാഗങ്ങള്‍ക്കും ലഭ്യമാക്കുകയാണ് പദ്ധതിയുടെ ലക്ഷ്യമെന്ന് മുഖ്യമന്ത്രി ഫേസ്ബുക്ക് പോസ്റ്റില്‍ വ്യക്തമാക്കി. ഏല്ലാവര്‍ക്കും പബ്ലിക്ക് വൈഫൈ സൗകര്യമുറപ്പാക്കുന്ന കെ ഫൈ ഉള്‍പ്പെടെ ഈ രംഗത്ത് നടപ്പാക്കുന്ന പദ്ധതികളിലൂടെ സമ്പൂര്‍ണ ഡിജിറ്റല്‍ സംസ്ഥാനമെന്ന ലക്ഷ്യത്തിലേക്കടുക്കുകയാണ് കേരളമെന്നും അദ്ദേഹം അറിയിച്ചു.