നിലമ്പൂര്‍: മലബാര്‍ മഹാസമരത്തിന് നൂറുവയസ് പൂര്‍ത്തിയാകുമ്പോള്‍ 1840 മുതല്‍ 1921 വരെയുള്ള പോരാട്ട ജീവിതം പറയുന്ന ഒരു നോവല്‍ കൂടി വായനക്ക്. പത്രപ്രവര്‍ത്തകനായ ഹംസ ആലുങ്ങലാണ് അഞ്ചുവര്‍ഷത്തെ ഗവേഷണത്തിനൊടുവില്‍ മൂന്നൂറില്‍പരം പേജുകളുള്ള നോവല്‍ എഴുതിയിരിക്കുന്നത്. മലബാര്‍ കലാപകാലത്ത് ബ്രിട്ടിഷ് പൊലിസില്‍ തിരൂരിലെ തടവുകാരെ ശ്രദ്ധിക്കാന്‍ നിയോഗിക്കപ്പെട്ട ഉദ്യോഗസ്ഥന്‍ സാര്‍ജന്റ് എ.എച്ച് ആന്‍ഡ്രൂസിന്റെ ഭാര്യയുടെ ഡയറിക്കുറിപ്പുകളിലൂടെയാണ് നോവല്‍ പുരോഗമിക്കുന്നത്. 1840കളില്‍ മലബാറില്‍ ജീവിച്ചിരുന്ന ബ്രിട്ടിഷ് ഉദ്യോഗസ്ഥരും കുടുംബങ്ങളും ആ കാലഘട്ടത്തിലെ മാപ്പിളകര്‍ഷകരും നേതാക്കളും നോവലില്‍ പുനര്‍ജനിക്കുന്നു.

പതിനായിരക്കണക്കിനു മനുഷ്യരെ മരണത്തിലേക്കുചവിട്ടിത്താഴ്ത്തിയ മലബാര്‍ കലാപമെന്ന വലിയ ദുരന്തത്തിന് 2021 ഓഗസ്റ്റിലാണ് 100 വയസ് പൂര്‍ത്തിയാകുന്നത്. ഒന്നാം സ്വാതന്ത്ര്യസമരകാലത്തിനുമുമ്പുള്ള മലബാറിലെ മുസ്‌ലിം ജീവിതമാണ് പ്രമേയം. കാര്‍ഷിക കലാപങ്ങള്‍, ഗറില്ലായുദ്ധങ്ങള്‍, കൊളോണിയല്‍ ഭരണകൂട ഭീകരതകള്‍, കനല്‍വഴിയിലെ പോരാട്ടവീര്യങ്ങള്‍, ചേരൂര്‍ കലാപം, തൃക്കാളൂര്‍ ലഹള, മുട്ടിച്ചിറ യുദ്ധം, മഞ്ചേരി, മണ്ണാര്‍ക്കാട് പള്ളിക്കുറുപ്പ് യുദ്ധങ്ങള്‍, മമ്പുറം തങ്ങന്‍മാരുടെ ആത്മീയനേതൃത്വം, നാടുകടത്തല്‍, ജില്ലാ കലക്ടര്‍ എച്ച്.വി കനോലിയുടെ വധം ഇവയെല്ലാം നോവലില്‍ പുനരവതരിപ്പിക്കപ്പെടുന്നു. 1840ല്‍ തുടങ്ങി 1921 ലെ വാഗണ്‍ ദുരന്തത്തിലവസാനിക്കുന്ന നോവലിന് അന്‍പത് അധ്യായങ്ങളുണ്ട്. ഒരുഭാഗത്ത് പൂര്‍ണമായും വാഗണ്‍ ദുരന്തത്തില്‍ മരിച്ചവരും ജീവിതത്തില്‍ നിന്നു തിരിച്ചുവന്നവരുമാണ് കഥാപാത്രങ്ങളാകുന്നത്. വൈകാതെ തുടര്‍ നോവലായി പ്രസിദ്ധീകരിക്കുമെന്ന് എഴുത്തുകാരന്‍ ഹംസ ആലുങ്ങല്‍ പറഞ്ഞു.
കിലാപത്തുകാലം, ചുവന്ന മേഘങ്ങള്‍, ചരിത്രത്തിന്റെ നിറം ചുവപ്പാണ്. മരണ വാഗണ്‍ എന്നിങ്ങനെ നാലുഭാഗങ്ങളാണ് നോവലിനുള്ളത്.