കൊച്ചി : രാജ്യത്താകമാനം മതതീവ്രവാദ ആശയങ്ങള്‍ പ്രചരിപ്പിച്ച് ബി.ജെ.പി രാഷ്ട്രീയ മുതലെടുപ്പിന് തയാറെടുക്കുകയാണെന്ന് വി.എസ് അച്യുതാനന്ദന്‍. എറണാകുളം ടൗണ്‍ഹാളില്‍ നടന്ന എ.ഐ.വൈ.എഫ് ജില്ലാ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.  ബാലറ്റിലൂടെ മാത്രം ഇതിന് തടയിടാന്‍ കഴിയില്ല. ആര്‍ജവമുളള യുവതലമുറയ്ക്കു മാത്രമേ ഇതിനെ ചെറുക്കാന്‍ കഴിയുകയുളളൂ. വൈവിധ്യങ്ങളുടെ നാട്ടില്‍ ആര്‍.എസ്.എസിന്റെ ചിട്ടവട്ടങ്ങള്‍ നടപ്പാക്കാനാണ് മോദി ശ്രമിക്കുന്നത്. ഹിന്ദുത്വത്തെ ദുര്‍വ്യാഖ്യാനം ചെയ്യുന്നത് അപമാനകരമാണ്. ചരിത്രത്തിന്റെ ഓര്‍മപ്പെടുത്തലുകള്‍ ഇതിനൊരു നല്ലപാഠമാണ്. ഫാഷിസം നിറഞ്ഞാടിയ ഇരുപതാം നൂറ്റാണ്ട് മാനവകുലത്തിന് മഹാമാരിയായിരുന്നു സമ്മാനിച്ചത്.  സരസ്വതി ശിശു മന്ദിരങ്ങളുടെ മറവില്‍ മതവിദ്വേഷം വളര്‍ത്താനാണ് ശ്രമം. രാജ്യത്തെ റോഡുകള്‍ക്കും പാലങ്ങള്‍ക്കും ഗോഡ്‌സേയുടെ പേര് നല്‍കുന്നത് ആര്‍.എസ്.എസ് അജന്‍ഡയാണ്. ജാതിയുടെയും മതത്തിന്റെയും പേരില്‍ തമ്മിലടിക്കുന്ന മനുഷ്യകുലത്തിന് നേര്‍മാര്‍ഗം കാട്ടിയ ഗുരുദേവന്റെ ദര്‍ശനങ്ങള്‍ പോലും വികലമാക്കപ്പെടുന്നു. ഗുരുദര്‍ശനങ്ങളെ സംരക്ഷിക്കാനുള്ള ഉത്തരവാദിത്വം ഏറ്റെടുത്തവര്‍ ആര്‍.എസ്.എസുമായി യോജിച്ചു പ്രവര്‍ത്തിക്കുന്ന കാഴ്ച ദയനീയമാണെന്നും വി.എസ് പറഞ്ഞു. യോഗത്തില്‍ അഡ്വ. കെ.എന്‍ സുഗതന്‍ അധ്യക്ഷനായിരുന്നു. നേതാക്കളായ മുല്ലക്കര രത്‌നാകരന്‍, കമലാ സദാനന്ദന്‍, കെ.കെ അഷറഫ്, എല്‍ദോ എബ്രഹാം, ബാബുപോള്‍, ടി.എന്‍ ഹാരിസ്, എന്‍. അരുണ്‍, ടി.സി സഞ്ജിത്ത് പ്രസംഗിച്ചു.