പാലക്കാട്: അട്ടപ്പാടി മധു വധക്കേസില്‍ കൂറുമാറിയ മറ്റൊരു സാക്ഷി കൂടി മൊഴി തിരുത്തി.പ്രതികളുടെ ഭാഗത്തേക്ക് കൂറുമാറിയ സാക്ഷിയാണ് പ്രോസിക്യൂഷന് അനുകൂലമായി മൊഴി നല്‍കിയത്.കേസിലെ 18-ാം സാക്ഷി കാളിമൂപ്പനാണ് പ്രോസിക്യൂഷന് അനുകൂലമായി മൊഴി തിരുത്തിയത്.മണ്ണാര്‍ക്കാട് എസ് എസ് ടി കോടതിയില്‍ വെച്ചാണ് ഇദ്ദേഹം പൊലീസിന് നല്‍കിയ മൊഴി ആവര്‍ത്തിച്ചത്.

കേസിലെ 19-ാം സാക്ഷി കക്കിയും ഇന്ന് കോടതിയില്‍ പ്രോസിക്യൂഷന് അനുകൂലമായി മൊഴി മാറ്റിയിരുന്നു.
പ്രതികളെ പേടിച്ചാണ് പിന്നീട് മാറ്റിപ്പറഞ്ഞതെന്നും കക്കി വ്യക്തമാക്കി. നേരത്തെ മൊഴി നല്‍കിയ സാഹചര്യമല്ല ഇപ്പോഴുള്ളതെന്ന് കാളിമൂപ്പനും കോടതിയില്‍ പറഞ്ഞു.മധുവിനെപ്പോലെ ഒരാളെ പിടിച്ചു വരുന്നതു കണ്ടു. അകമലയില്‍ വെച്ച് മധുവിനെ കണ്ടു. ഈ വിവരം രണ്ടാം പ്രതിയോട് പറഞ്ഞുവെന്നുമാണ് കക്കി നേരത്തെ പൊലീസിന് കൊടുത്തിരുന്ന മൊഴി. രണ്ടാം പ്രതിയെ സാക്ഷി കോടതിയില്‍ തിരിച്ചറിഞ്ഞു. ഇരുവരും നേരത്തെ വനംവകുപ്പിന്റെ താല്‍ക്കാലിക വാച്ചര്‍മാരായിരുന്നു. പ്രതികള്‍ക്ക് അനുകൂലമായി മൊഴി മാറ്റിയതിനെ തുടര്‍ന്ന് ഇരുവരെയും ജോലിയില്‍ നിന്നും പിരിച്ചുവിട്ടിരുന്നു.