പൂര്‍ണമായും വിശ്വസിക്കാന്‍ വരട്ടെ….ഗൂഗ്ള്‍ മാപ്പ് അത്ര വിശ്വസ്തനല്ല

എത്തിച്ചേരേണ്ട സ്ഥലം കണ്ടെത്താന്‍ മുന്നില്‍ കാണുന്നവരോടെല്ലാം ചോദിച്ച് പോകുന്ന കാലമൊക്കെ പോയിട്ട് കുറച്ചായി. ഇപ്പോള്‍ എല്ലാം വിരല്‍തുമ്പില്‍തന്നെയുണ്ടാകുമ്പോള്‍ എന്തിന് പേടിക്കണം. ഗൂഗിള്‍ മാപ്പാണ് വിഷയം. കാറിലാണേലും, ബൈക്കിലാണേലും, ഏത് വാഹനത്തിലായാലും എത്രദൂരം ആണേലും ഒന്നും വിഷയമല്ല. ഗൂഗ്ള്‍ മാപ്പ് ഉണ്ടല്ലോ പിന്നെന്താ…എന്നാല്‍ കണ്ണും പൂട്ടി വിശ്വസിക്കാന്‍ വരട്ടെ…കാര്യങ്ങള്‍ അത്രവെടിപ്പല്ല. കാരണം ഗൂഗ്ള്‍ മാപ്പ് ചിലപ്പോ സ്ഥലം മുഴുവന്‍ ചിറ്റിച്ചാലും ഉദ്ദേശിച്ച് സ്ഥലത്ത് എത്തിയെന്ന് വരില്ല, ചിലപ്പോ മരണം വരെ സംഭവിക്കാനും ഗൂഗ്ള്‍ മാപ്പ് കാരണമാവും.

കാലാവസ്ഥ മോശമാകുമ്പോള്‍ ഗൂഗിള്‍ മാപ്പിനും വഴിതെറ്റുന്നുണ്ട്. ഡ്രൈവിങ്ങിന് ഏറെ ഗുണകരമാണ് ഗൂഗിള്‍ മാപ്പ് എങ്കിലും, കാലാവസ്ഥ മോശമാകുമ്പോള്‍ ഗൂഗിള്‍ മാപ്പിനും വഴിതെറ്റുന്നതിന്റെ തെളിവാണ് ഗൂഗിള്‍ മാപ്പിന്റെ സഹായത്തോടെയുള്ള യാത്രയില്‍ അപകടങ്ങള്‍ ഉണ്ടാകുന്നു എന്ന വാര്‍ത്തകള്‍ വരുന്നത്.

കഴിഞ്ഞ ദിവസമാണ് എറണാകുളം പരവൂര്‍ ഗോതുരുത്തില്‍ ഗൂഗിള്‍ മാപ്പ് നോക്കി അഞ്ചംഗ സംഘം സഞ്ചരിച്ച കാര്‍ പുഴയില്‍ വീണ് രണ്ട് ഡോക്ടര്‍മാര്‍ക്ക് ദാരുണാന്ത്യം സംഭവിച്ചത്. കൊടുങ്ങല്ലൂര്‍ സ്വകാര്യ ആശുപത്രിയിലെ ഡോക്ടര്‍മാരായ അദ്വൈത്, അജ്മല്‍ എന്നിവരാണ് മരിച്ചത്. മെഡിക്കല്‍ വിദ്യാര്‍ഥിയും, നഴ്‌സുമായിരുന്നു കാറിലുണ്ടായിരുന്നവര്‍. ഈ അപകടത്തിന് പ്രധാന കാരണമായത് ഗൂഗ്ള്‍ മാപ്പിന്‍ തെറ്റായ വഴികാണിക്കലാണ്. അതുപോലെ കടുത്തുരുത്തിയില്‍ 2022ല്‍ ഗൂഗിള്‍ മാപ്പ് നോക്കി വാഹനമോടിച്ചെത്തിയ ടൂറിസ്റ്റ് സംഘം തോട്ടില്‍ വീണിരുന്നു. സമയോചിതമായി നാട്ടുകാര്‍ ഇടപെട്ടതിനാല്‍ വലിയ അപകടമൊഴിവായി. ഇത്തരം ഒരുപാട് അപകടങ്ങള്‍ ഇടയ്ക്കിടെ സംഭവിക്കുന്നുണ്ട്.

ഇങ്ങനെ അപകടങ്ങള്‍ തുടര്‍കഥയാകുമ്പോള്‍ ഗൂഗിള്‍ മാപ്പ് ഉപയോഗിച്ച് സഞ്ചരിക്കുമ്പോള്‍ ശ്രദ്ധിക്കേണ്ട കാര്യങ്ങള്‍ കേരള പോലീസ് വിവരിക്കുന്നു.
ആധുനികകാലത്ത് ഡ്രൈവിങ്ങിന് ഏറെ സഹായകരമാണ് ഗൂഗിള്‍ മാപ്പ്. എന്നാല്‍, പരിചിതമല്ലാത്ത വഴികളിലൂടെ മാപ്പ് നോക്കി സഞ്ചരിക്കുന്നത് ചിലപ്പോഴെങ്കിലും അപകടം സൃഷ്ടിക്കുന്നു.

• വെള്ളപ്പൊക്കം, പേമാരി തുടങ്ങിയ പ്രകൃതി ദുരന്തങ്ങള്‍ നേരിടുന്ന അവസരങ്ങളില്‍ പലപ്പോഴും റോഡ് ഗതാഗതം തിരിച്ചുവിടാറുണ്ട്. ഇത് ഗൂഗിള്‍ മാപ്പ് പറഞ്ഞു തന്നെന്നു വരില്ല.
• മണ്‍സൂണ്‍ കാലങ്ങളില്‍, ട്രാഫിക് കുറവുള്ള റോഡുകളെ ഗൂഗിള്‍ മാപ്പ് അല്‍ഗോരിതം എളുപ്പം എത്തുന്ന വഴിയായി നമ്മളെ നയിക്കാറുണ്ട്. എന്നാല്‍ തിരക്ക് കുറവുള്ള റോഡുകള്‍ സുരക്ഷിതമായിക്കൊള്ളണമെന്നില്ല.
• തോടുകള്‍ കവിഞ്ഞൊഴുകിയും മണ്ണിടിഞ്ഞും മരങ്ങള്‍ കടപുഴകി വീണും യാത്ര സാധ്യമല്ലാത്ത റോഡുകളിലൂടെയും വീതി കുറഞ്ഞതും സുഗമ സഞ്ചാരം സാധ്യമല്ലാത്ത അപകടങ്ങള്‍ നിറഞ്ഞ റോഡുകളിലൂടെയും ഗൂഗിള്‍ മാപ്പ് നയിച്ചേക്കാം. എന്നാല്‍ നമ്മെ അത് ലക്ഷ്യസ്ഥാനത്ത് എത്തിച്ചുകൊള്ളണമെന്നില്ല.
• അപകട സാദ്ധ്യത കൂടിയ മഴക്കാലത്തും രാത്രികാലങ്ങളിലും തീര്‍ത്തും അപരിചിതവും വിജനവുമായ റോഡുകള്‍ ഒഴിവാക്കുന്നതാണ് സുരക്ഷിതം.
• രാത്രികാലങ്ങളില്‍ GPS സിഗ്‌നല്‍ നഷ്ടപ്പെട്ട് ചിലപ്പോള്‍ വഴി തെറ്റാനിടയുണ്ട്.

• സഞ്ചാരികള്‍ കൂടുതല്‍ തിരയുന്ന റിസോര്‍ട്ടുകളും ടൂറിസ്റ്റ് കേന്ദ്രങ്ങളും ഗൂഗിള്‍ ലൊക്കേഷനില്‍ മന:പൂര്‍വ്വമോ അല്ലാെതയൊ തെറ്റായി രേഖപ്പെടുത്തി ആളുകളെ വഴിതെറ്റിക്കുന്നതും അപകടത്തില്‍ പെടുത്തുന്നതും ശ്രദ്ധിക്കേണ്ട വസ്തുതയാണ്.
• സിഗ്‌നല്‍ നഷ്ടപ്പെടാന്‍ സാധ്യതയുള്ള റൂട്ടുകളില്‍ നേരത്തെ തന്നെ റൂട്ട് സേവ് ചെയ്യാം.
• മാപ്പില്‍ യാത്രാരീതി സെലക്ട് ചെയ്യാന്‍ മറക്കരുത്. നാലുചക്രവാഹനങ്ങള്‍, ഇരുചക്രവാഹനങ്ങള്‍, സൈക്കിള്‍, കാല്‍നടയാത്ര, ട്രെയിന്‍ എന്നിങ്ങനെയുള്ള ഓപ്ഷനുകളില്‍ ഏതാണെന്ന് വച്ചാല്‍ അത് തെരഞ്ഞെടുക്കുക. ബൈക്ക് പോകുന്ന വഴി ഫോര്‍ വീലര്‍ പോകില്ലല്ലോ.. ഈ കാരണം കൊണ്ടുതന്നെ വഴി തെറ്റാം.
• ഒരു സ്ഥലത്തേക്ക് പോകാന്‍ രണ്ടുവഴികളുണ്ടാകും. ഈ സന്ദര്‍ഭങ്ങളില്‍ ഇടയ്ക്ക് നമുക്ക് അറിയാവുന്ന ഒരു സ്ഥലം ആഡ് സ്റ്റോപ്പ് ആയി നല്‍കിയാല്‍ വഴി തെറ്റുന്നത് ഒഴിവാക്കാം.
• *വഴി തെറ്റിയാല്‍ ലക്ഷ്യ സ്ഥാനത്തേക്കുള്ള മറ്റൊരു വഴിയാകും ഗൂഗിള്‍ മാപ്പ് കാണിച്ചു തരിക. എന്നാല്‍, ഈ വഴി ചിലപ്പോള്‍ ഫോര്‍ വീലര്‍ അല്ലെങ്കില്‍ വലിയ വാഹനങ്ങള്‍ പോകുന്ന വഴി ആകണമെന്നില്ല.

• ഗതാഗത തടസ്സം ശ്രദ്ധയില്‍പെട്ടാല്‍ ഗൂഗിള്‍ മാപ്പ് ആപ്പിലെ cotnribute എന്ന ഓപ്ഷന്‍ വഴി റിപ്പോര്‍ട്ട് ചെയ്യാം. ഇവിടെ എഡിറ്റ് മാപ്പ് ഓപ്ഷനില്‍ add or fix road എന്ന ഓപ്ഷന്‍ വഴി പ്രശ്‌നം റിപ്പോര്‍ട്ട് ചെയ്യാം. ഗൂഗിള്‍ മാപ്‌സ് ഇക്കാര്യം പരിഗണിക്കും. ഇത് പിന്നീട് അതു വഴി വരുന്ന യാത്രക്കാര്‍ക്ക് തുണയാകും. തെറ്റായ സ്ഥലനാമങ്ങളും അടയാളപ്പെടുത്താത്ത മേഖലകളുമൊക്കെ ഈ രീതിയില്‍ ഗൂഗിളിനെ അറിയിക്കാം.