പൂച്ചാക്കല്‍: ഓട്ടോറിക്ഷയില്‍  മറന്ന് വെച്ച വിദേശ വനിതയുടെ ബാഗ് തിരികെ നല്‍കി നിഷാദ് മാതൃകയായി. ഓട്ടോറിക്ഷാതൊഴിലാളിയായ പാണാവള്ളി പഞ്ചായത്ത് പത്താം വാര്‍ഡ് അറക്കംവെളിയില്‍ നിഷാദാണ് കഴിഞ്ഞ ദിവസം തന്റെ ഓട്ടോയില്‍ കളഞ്ഞു കിട്ടിയ ലേഡീസ് ബാഗ് പോലീസില്‍ ഏല്‍പ്പിച്ച് മാതൃകയായത്. എറണാകുളം മേനക ഭാഗത്ത് നിന്നും ഓട്ടോയില്‍ കയറിയ ടൂറിസ്റ്റുകളായ ഖത്തര്‍ സ്വദേശി വനിതയുടെ ബാഗാണ് എടുക്കാന്‍ മറന്നത്. പലസ്ഥലങ്ങളിലും  നിഷാദ് അവരെ അന്വേഷിച്ചുവെങ്കിലും കണ്ടെത്തുവാന്‍ കഴിഞ്ഞില്ല.
പിന്നീട് സിറ്റി ട്രാഫിക് പൊലിസില്‍ ബാഗ് ഏല്‍പ്പിക്കുകയായിരുന്നു. പാസ്സ്‌പോര്‍ട്ട്, ഐ.ഡി കാര്‍ഡുകള്‍, ഫോണ്‍ എന്നിവയായിരുന്നു ബാഗില്‍ ഉണ്ടായിരുന്നത്. ബാഗ് കളഞ്ഞു പോയതിനെ തുടര്‍ന്ന് വിദേശ വനിത പൊലിസില്‍ പരാതി നല്‍കിയിരുന്നു. ബാഗ് സിറ്റി ട്രാഫിക് പൊലിസില്‍ ലഭിച്ചിട്ടുണ്ടെന്ന് വിവരം ലഭിച്ച ഖത്തര്‍ വനിത പൊലിസിനെ സമീപിച്ച്  ബാഗ് തിരിച്ചു വാങ്ങുകയും നിഷാദിനെ വിളിച്ചു വരുത്തി പ്രത്യേകം അനുമോദിക്കുകയും ചെയ്തു.