ക്രിക്കറ്റ് മാമാങ്കത്തിന് ഇന്ന് കൊടിയേറ്റം; ആദ്യ മത്സരത്തില്‍ ഇംഗ്ലണ്ടും ന്യൂസിലാന്റും നേര്‍ക്കുനേര്‍

അഹമ്മദാബാദ്: 10 രാജ്യക്കാര്‍ ക്രിക്കറ്റിലെ കനകക്കിരീടം തേടിയിറങ്ങുന്ന ക്രിക്കറ്റ് ലോകകപ്പിന് ഇന്ന് അഹമ്മദാബാദില്‍ തുടക്കം. റാങ്കിങ്ങിലെ മികച്ച എട്ടു ടീമുകളും യോഗ്യതാ മത്സരം കളിച്ചെത്തിയ രണ്ട് ടീമുകളുമാണ് 13ാമത് ക്രിക്കറ്റ് ലോകകപ്പില്‍ പോരിനിറങ്ങുന്നത്. പൂര്‍ണമായും ഇന്ത്യയില്‍ നടക്കുന്ന ടൂര്‍ണമെന്റിന് രാജ്യത്തെ 10 നഗരങ്ങളാണ് ആതിഥ്യമരുളുന്നത്. അഹമ്മദാബാദ്, ബംഗളൂരു, ചെന്നൈ, ഡല്‍ഹി, ധര്‍മശാല, ഹൈദരാബാദ്, കൊല്‍ക്കത്ത, ലക്‌നൗ, മുംബൈ, പൂനെ എന്നിവിടങ്ങളിലാണ് മത്സരങ്ങള്‍ നടക്കുക. ഇന്ന് ഉച്ചക്ക് രണ്ടിന് അഹമ്മദാബാദിലെ നരേന്ദ്രമോഡി സ്‌റ്റേഡിയത്തിലാണ് ഉദ്ഘാടന മത്സരം. ആദ്യ മത്സരത്തില്‍ ഇംഗ്ലണ്ടും ന്യൂസിലന്‍ഡും തമ്മിലാണ് കൊമ്പുകോര്‍ക്കുന്നത്. ഇന്ത്യ, ആസ്‌ത്രേലിയ, ഇംഗ്ലണ്ട്, പാകിസ്താന്‍, ബംഗ്ലാദേശ്, ശ്രീലങ്ക, ന്യൂസിലന്‍ഡ്, ദക്ഷിണാഫ്രിക്ക, നെതര്‍ലന്‍ഡ്‌സ്, അഫ്ഗാനിസ്താന്‍ എന്നിവരാണ് കിരീടം തേടി വിശ്വ പോരിനിറങ്ങുന്നത്.

ഇന്ന് ഇംഗ്ലീഷ് – കിവി പോര്

ലോകകപ്പിന് മുന്നോടിയായി ന്യൂസിലന്‍ഡിനെതിരായ ഏകദിന പരമ്പര തൂത്തുവാരിയാണ് ജോസ് ബട്‌ലറുടെ നേതൃത്വത്തിലുള്ള ഇംഗ്ലീഷ് പട എത്തുന്നത്. മൂന്ന് ഏകദിനത്തിലും വന്‍ മാര്‍ജിന്‍ ജയം. ആദ്യ ഏകദിനത്തില്‍ 79 റണ്‍സിന് ജയിച്ച ഇംഗ്ലണ്ട് രണ്ടാം മത്സരത്തില്‍ 181 റണ്‍സിനും വെന്നിക്കൊടി നാട്ടി. മൂന്നാം മത്സരത്തില്‍ 100 റണ്‍സിന് ജയിച്ചായിരുന്നു ഏകദിന പരമ്പര തൂത്തുവാരിയത്. ബെന്‍ സ്‌റ്റോക്‌സ്, ജോ റൂട്ട്, മൊയീന്‍ അലി എന്നിവരാണ് നിലവിലെ ചാംപ്യന്‍മാരായ ഇംഗ്ലണ്ടിന്റെ കരുത്ത്.

ഇന്നത്തെ മത്സരത്തില്‍ സ്ഥിര നായകന്‍ കെയിന്‍ വില്യംസന് പകരം ടോം ലാഥമാണ് ന്യൂസിലന്‍ഡ് ടീമിനെ നയിക്കുന്നത്. മിച്ചല്‍ സാന്റ്‌നര്‍, ഡേവണ്‍ കോണ്‍വേ, ട്രെന്‍ഡ് ബോള്‍ട്ട് എന്നീ പ്രധാനികള്‍ കിവികള്‍ക്കായും കളത്തിലിറങ്ങുമ്പോള്‍ ഇന്ന് നരേന്ദ്രമോഡി സ്‌റ്റേഡിയത്തില്‍ തീപാറുന്ന പോരാട്ടം പ്രതീക്ഷിക്കാം. ഇരു ടീമുകളും ഇതുവരെ 89 തവണയാണ് നേര്‍ക്കുനേര്‍ മത്സരിച്ചത്. ഇതില്‍ 45 എണ്ണത്തില്‍ ഇംഗ്ലണ്ട് ജയിച്ചപ്പോള്‍ ന്യൂസിലന്‍ഡ് 44 മത്സരത്തിലും വിജയം കൊയ്തു.
ലോകകപ്പിന് മുന്നോടിയായി നടന്ന രണ്ട് സന്നാഹ മത്സരങ്ങളില്‍ പാകിസ്താനെയും ദക്ഷിണാഫ്രിക്കയെയും തുരത്തി സര്‍വ സജ്ജരായിട്ടാണ് കിവീസ് ടീം ഇന്ന് കളത്തിലിറങ്ങുന്നത്.