മുംബൈ: ഹാജി അലി ദര്‍ഗയുടെ ഖബര്‍സ്ഥാനില്‍ സ്ത്രീകള്‍ക്കും പ്രവേശിക്കാമെന്ന് ഹൈക്കോടതി. വനിതാ സംഘടനകള്‍ നല്‍കിയ ഹരജിയിലാണ് ബോംബെ ഹൈക്കോടതിയുടെ വിധി.

സ്ത്രീകള്‍ക്ക് പ്രവേശനാനുമതി നിഷേധിക്കുന്നത് ഭരണഘടന അനുശാസിക്കുന്ന മൗലികാവകാശങ്ങളുടെ ലംഘനമാണെന്നും സ്ത്രീകള്‍ പ്രവേശിക്കുന്നത് തടയാന്‍ ട്രസ്റ്റിന് അധികാരമില്ലെന്നും ഹൈക്കോടതി ചൂണ്ടിക്കാട്ടി. സ്ത്രീകള്‍ക്കും ദര്‍ഗയില്‍ പ്രവേശിക്കാന്‍ ആവശ്യമായ സുരക്ഷ മഹാരാഷ്ട്രാ സര്‍ക്കാര്‍ ഒരുക്കണമെന്നും ഹൈകോടതി ഉത്തരവിട്ടു.

അതേ സമയം വിധി നടപ്പാക്കുന്നത് ആറ് ആഴ്ച്ചത്തേക്ക് നീട്ടിവെച്ചിട്ടുണ്ട്. വിധിക്കെതിരെ സുപ്രിംകോടതിയില്‍ അപ്പീല്‍ നല്‍കണമെന്ന് ഹാജി അലി ദര്‍ഗ ട്രസ്റ്റ് അറിയിച്ചതോടെയാണ് വിധി നടപ്പാക്കുന്നത് നീട്ടിയത്.

ആറ് നൂറ്റാണ്ട് പഴക്കമുള്ള ഹാജി അലി ദര്‍ഗയില്‍ അഞ്ചു വര്‍ഷങ്ങള്‍ക്ക് മുമ്പാണ് സ്ത്രീകള്‍ക്ക് പ്രവേശനം നിഷേധിച്ചത്.