കോട്ടയം: പൊലിസ് സ്‌റ്റേഷന് മുന്നില്‍ വെച്ച് യുവതിയെ കുത്തിപ്പരുക്കേല്‍പിച്ച് യുവാവ്. പാമ്പാടി കുറ്റിക്കല്‍ സ്വദേശിനിക്കാണ് കറുകച്ചാല്‍ പൊലിസ് സ്റ്റേഷന് മുന്നില്‍ വച്ച് കുത്തേറ്റത്. സംഭവവുമായി ബന്ധപ്പെട്ട് പാമ്പാടി പൂതക്കുഴി സ്വദേശി അഖിലിനെ പൊലിസ് കസ്റ്റഡിയിലെടുത്തു.

വ്യാഴാഴ്ച്ച രാവിലെ 11.30ഓടെയായിരുന്നു സംഭവം. സുഹൃത്തിനൊപ്പം കറുകച്ചാലിലെത്തിയതായിരുന്നു പെണ്‍കുട്ടി.. ഈ സമയത്താണ് അഖില്‍ ഇവിടെയെത്തി പെണ്‍കുട്ടിയെ ആക്രമിച്ചത്. ഇടത് കൈയ്ക്കാണ് കുത്തേറ്റത്. പെണ്‍കുട്ടി പൊലിസ് സ്റ്റേഷനിലേക്ക് ഓടിക്കയറി. തുടര്‍ന്ന് പെണ്‍കുട്ടിയെ സമീപത്തെ ആശുപത്രിയിലെത്തിച്ച് ചികിത്സ നല്‍കി. പരുക്ക് ഗുരുതരമല്ല.

ആക്രമണം പ്രണയപ്പകയെ തുടര്‍ന്നാണെന്നാണ് പൊലീസിന്റെ പ്രാഥമിക നിഗമനം. അഖിലുമായി പെണ്‍കുട്ടിക്ക് നേരത്തെ സൗഹൃദമുണ്ടായിരുന്നു. പിന്നീട് ഈ ബന്ധം പെണ്‍കുട്ടി ഉപേക്ഷിച്ചിരുന്നു.